ФИНКИ ќе ги презентира ресурсите на Виртуелната истражувачка околина пред истражувачите од регионот

 
Можностите што ги нуди Виртуелната истражувачка околина (VRE) за истражувачите во југоисточна Европа и источен Медитеран, особено за тие кои се насочени кон науките за животот (Life Sciences), климатологијата и дигитализацијата на културното наследство, ќе бидат презентирани на утрешниот настан што ќе се одржи на Факултетот за информатички науки и компјутерско инженерство (ФИНКИ).

Настанот ќе се одржува во Амфитеатарот на ФИНКИ (Анекс на ТМФ) од 9:30 до 16 часот и е отворен за сите заинтересирани. Регистрацијата за овој настан завршува денеска (17 октомври).

Креирањето Виртуелната истражувачка околина е дел од проектот ВИ-СЕЕМ, чиј носител во Македонија е ФИНКИ. Дополнително, во овој проект се вклучени и Фармацевтскиот и Природно математичкиот факултет при УКИМ, како и Управата за хидрометеорологија. Овој проект се базира на серијата успешно реализирани регионални проекти со кои се градеше мрежната инфраструктура, а потоа врз неа и пресметувачките ресурси во овој регион. Проектот овозможува унифициран пристап до е-Инфрастуктурите преку интегрирана платформа, овозможувајќи им на научниците да се фокусираат што можно повеќе на своите истражувачки области, потпомогнати со силна ИКТ поддршка.

Од ФИНКИ истакнуваат дека сервисите што ги нуди овој проект се наменети за целата научно-истражувачка јавност од регионот, а пристапот до нив е базиран на отворени повици. Рангот на сервиси што се нудат во проектот е многу широк и опфаќа пресметувачки ресурси (суперкомпјутерси, грид кластери и клауд ресурси), ресурси за складирање, управување и визуелизација на податоци, заедничка рамка за автентикација, како и многу други интердисциплинарни или фокусирани сервиси кон една од споменатите истражувачки заедници.

- Досега преку овие повици, три истражувачки групи, од кои две од областа на климатологијата и една од науките за животот, успешно ги искористуваат понудените регионални ресурси. Очекуваме дека и други истражувачки групи и заедници ќе покажат интерес за искористување на овие ресурси, за кои ФИНКИ е подготвен да им излезе во пресрет и да ги поддржи во нивните апликации, а потоа и во користењето на овие ресурси за постигнување врвни научно истражувачки резултати – велат од ФИНКИ.

Повеќе информации за настанот може да најдете на страницата:

https://events.hpc.grnet.gr/event/55/