Првото тримесечје завршува, сѐ уште фалат учебници во основно

Македонските ученици сѐ уште ги немаат сите потребни учебници за непречено одвивање на наставата во оваа учебна година. Родители се жалат дека нивните деца и на крајот од првото тримесечје не добиле учебници по сите предмети. И од Министерството за образование и наука признаваат дека се уочени системски недостатоци и дека за таа цел, формирана е работна група која работи на изготвување законски измени во делот на учебниците.


- Се разгледуваат сите прашања што значат подобрување на сегашниот систем за обезбедување бесплатни учебници во училиштата и отстранување на сите проблеми, како и воспоставувањето стандарди за учебниците – велат од ресорното министерство.

Учебниците во основното образование се пренесуваат од генерација на генерација. Некои деца добиваат учебници со искинати страници или се пред распаѓање.

- Според информациите што ги добивме од училиштата, беше согледано колку и од кои предмети недостигаат учебници. Пред почетокот на учебната година беа завршени тендерските постапки и беа дистрибуирани учебниците во училиштата. Од училиштата понекогаш доставуваат податоци кои се разликуваат од првично утврдената потреба, зашто на нив понекогаш им е непознат конечниот број на ученици, па потребно е да се направи приспособување на бројката на потребни учебници, а тоа предизвикува доцнење при дистрибуцијата на дополнителните учебници – објаснуваат од МОН.


Според педагошката служба во Министерството, во изминатите години по неколку предмети од различни одделенија воопшто не биле изработени учебници и тие предмети се изучувале без да постои учебник. Од МОН потенцираат дека најголем број предмети од шесто одделение требало да бидат обновени уште минатата година, но „тоа не било направено и тиражот не бил обновен по одредени предмети“.

- Одредени учебници по странски јазик не се обновени и доставени поради тоа што во тек беа жалбени постапки и спорови меѓу издавачки куќи околу тоа кој е овластен дистрибутер на учебникот. Некои од овие спорови се завршени, некои сè уште траат и тие учебници не можеме да ги откупиме додека не завршат овие постапки – потенцираат од прес-службата на Министерството за образование и наука.