Најмладиот шеф на држава во Европа има 27 години

Сан Марино, доколку не сте знаеле, по државно уредување е република. Со неа управува колективен орган составен од двајца капетани регенти, кои се избираат на шест месеци. Избраното дуо е назначено од страна на Големиот и генерален совет, што е всушност парламентот на Сан Марино, со 60 избрани члена.

Тие го избираат Државниот конгрес, а тоа всушност е владата. Капетаните регенти ја вршат функцијата шеф на државата и на владата. Оваа диархија, инаку, има потекло директно од конзулот во времето на Римското Царство.



Денес титулата за најмлад шеф на држава му припаѓа на едно момче од Сан Марино. Како што пренесува италијанскиот медиум „Република“, станува збор за 27-годишниот Матео Чијачи, кој на први април ќе стане капетан регент. Инаку, обичај е двајцата регенти да бидат од различни политички опции, а тој му припаѓа на движењето Civico 10. Матео студирал право во италијанскиот град Урбино, а во ноември 2016 година бил избран за член на парламентот.