Дескоска: Новите програми прво ќе пилотираат во одредени училишта

Новите наставни програми ќе пилотираат во одредени училишта за да се видат ефектите. Дури потоа ќе се донесе одлука целосно да влезат во улилиштата, рече денеска министерката за образование и наука Рената Дескоска на Меѓународната конференција по природни науки и математика која се одржува на Природно-математичкиот факултет во Скопје.

На прашањето што се случува со програмата по математиката во основното образование, откако проф. д-р Горѓи Маркоски, раководител на Институтот за математика при ПМФ рече дека во нивото што е понудено е за оценка 2 или 3 кај учениците, Дескоска одговори:

- Сите програми ги отворивме во пакетот реформи во основното образование. Истото ќе се случи и со средното образование. Стручните лица во своите области ќе работат на новите програми. Не може да очекувате дека сè ќе се замени преку ноќ, со оглед на тоа што е голема работа и големи се трошоците. Но, постепено сакаме да донесеме програма која навистина ќе значи равој на знаењата на учениците и компететивност на меѓународно ниво. Мојот план е да се пилотира. Во изминатиот период видовме ситуации во кои без анализа, преку ноќ беа внесувани наставни програми и потоа се чудеа од добиените резултати. Од аспект на сигурен и обмислен пристап, побезбедна варијанта е пилотирање на наставните програми во одредени училишта за да ги видиме ефектите, а потоа да се донесе одлука за целосно влегување во сите училишта.