Првиот „Tech Talks“ ќе биде посветен на една од најактуелните теми во технолошкиот свет – сајбер-безбедноста. Сајбер-нападите, заштитата на податоците и безбедноста на дигиталните системи одамна не се прашања резервирани само за ИТ-секторот. Тие се дел од секојдневното функционирање на компаниите и институциите, а со тоа расте и потребата од професионалци кои можат да ги препознаат ризиците, да ги заштитат системите и да одговорат на сè посложените безбедносни предизвици.

Настанот е наменет, пред сè, за средношколци, студенти и сите што се заинтересирани за градење кариера во ИТ и сајбер-безбедноста. Во формат на панел-дискусија, професионалци од индустријата ќе зборуваат за тоа како навистина изгледа работата во оваа област, кои знаења и вештини се потребни, со какви предизвици се соочуваат во практика и какви можности за професионален развој нуди секторот.

На панелот ќе учествуваат Драган Шахпаски, CTO во Sorsix, Јане Мирчески, Managing Director во Tessa Sec Skopje, Ивица Ѓорѓевски, Information Security Officer во Стопанска банка АД Скопје, Марјан Стоилковски, Head of IT Security во НЛБ Банка и Димитар Богатинов, инструктор за EC-Council програмите во Семос Едукација и редовен професор на Воената академија „Генерал Михаило Апостолски“ - Скопје.

Низ разговорот, петтемина професионалци ќе ги отворат прашањата што најчесто ги интересираат оние што размислуваат за кариера во сајбер-безбедноста: од каде се започнува, кои знаења и вештини денес ги бараат компаниите, кои се различните кариерни насоки и како изгледа работата во оваа област во практика. Ќе се разговара и за актуелните трендови и безбедносни предизвици, како и за можностите за влез и понатамошен развој во индустријата.

Посебен дел од настанот ќе биде посветен на директна комуникација со публиката, која ќе има можност да поставува прашања до панелистите и од прва рака да слушне искуства што тешко можат да се добијат преку опис на работна позиција или пребарување на интернет. Идејата е младите што размислуваат за оваа професија да добијат пореална слика за неа – не само за можностите што ги нуди, туку и за знаењето, континуираното учење и одговорноста.

Со „Tech Talks“, Семос Едукација отвора нов формат преку кој актуелните теми од ИТ-индустријата ќе ги доближува до младите и до сите што сакаат подобро да ги разберат професиите и промените што го обликуваат технолошкиот сектор. Серијалот ќе продолжи и со други теми, со иста идеја, разговорот за технологијата да се води со луѓето кои секојдневно ја создаваат, применуваат и развиваат.

(Комерцијална објава)