Ана Бегенхолм е радиолог во универзитетската болница во Тромзо, во северниот дел на Норвешка. Пред околу 17 години во истата болница се запишала во историјата, но овојпат како пациент.



По несреќата што ја имала додека скијала, телесната температура паднала до 13,7 степени, но тимот лекари успеал да ја врати во живот. Во 1999 година Ана и нејзините колеги се упатиле на скијање по работниот ден. Временските услови биле одлични. Но, по некое време се случила катастрофа: Ана останала без скиите. Се тркалала по стазата додека не удрила во смрзнат поток. Пропаднала во мразот, а студената вода ја повлекла на дното. Додека пријателите се обидувале да ја извлечат, температурата на телото и опаѓала до момент кога ситуацијата станала многу опасна.

Нормалната температура на телото е 37 степени. Во услови на ветер, студенило и вода, телото се лади. Во моментот кога телото ќе го почувствува тоа, започнува со одбрана на телесната температура, па крвните садови и кожата почнуваат да се собираат, а крвта од екстремитетите се пренасочува кон средината. Под 35 степени телесна температура доаѓа до хипотермија: паѓа крвниот притисок, дишењето е плитко, а може да се случи и чудно однесување на личноста.

Ана под водата била околу 80 минути. Срцето не ѝ чукало, кожата ѝ била бела, а зениците раширени. Превезувањето до хеликоптерот траело дополнителен час и за тоа време медицинскиот тим се обидувал да ја оживее. Според изјавите на докторите, на електрокардиограмот линијата била рамна и немало знаци на живот. Температурата на телото се спуштила до 13,7 степени.

Во болницата ја приклучиле на апарати, а крвта и се испумпувала надвор од организмот, па се враќала назад за да може да се загрее. Срцето на Ана започнало да чука по 16 часа, по што и целото тело полека почнало да се враќа во нормала, а по 12 дена таа ги отворила и очите. По неколку години повторно можела да се движи, да оди и да скија.

Всушност, иако студената вода го запрела срцето, ги парализирала мускулите и исцрпила нервите, го сочувала нејзиниот мозок. Благодарение на тоа, според лекарите, Ана не умрела од смрзнување, туку само се смрзнала.