Целата идеја произлегла од балканската група „Изнајмувачи со срце“ која се прошири по социјалните мрежи со брзина на светлината. Оваа иницијатива им е наменета пред сѐ на децата со пречки во развојот и телесен инвалидитет, чии родители се во загрозена социјална состојба.
За само неколку дена успеаја да ги разбудат граѓаните и да ги натераат да обрнат поголемо внимание на децата со посебни потреби, болните и сиромашните деца. Велат дека сме им неопходни на невините душички, чиј живот си поиграл со нив. Сакаат сите заедно да им покажеме со дела дека навистина ни значат и дека вредат во ова општество, дека не се отфрлени, дека не се заборавени...
Ова се накусо целите на групата „Бесплатно сместување – Македонија“, која за само неколку дена придоби многу членови. Со ова Македонија се вклучи во хуманитарната иницијатива што последниов месец вртоглаво го зарази целиот Балкан – сопственици на туристички објекти им нудат бесплатен одмор на деца од различни ранливи категории.
Групата „Бесплатно сместување – Македонија“ на социјалната мрежа „Фејсбук“ ја администрираат тројца - Петре Димитров, уредник и сопственик на „еМагазин.мк“, Христина Силјановска-Јосимовска, мајка на дете со церебрална парализа и претседателка на Хуманитарното здружение на граѓани и лица со хендикеп „Илинден“ од Скопје, и Јасна Милкиќ, професорка по француски јазик, хуманитарен активист, администратор на групата за помош на поплавените семејства во Скопје, која е преименувана во „Хуманитарна помош - граѓанска иницијатива“.
За само неколку дена не само што ги освоија симпатиите и почитта од многумина туку и им влеаја надеж и радост на многу семејства и дечиња.
Најмногу пријавени родители на деца со аутизам и Даунов синдром
Јасна Милкиќ објаснува како целата идеја произлегла од балканската група „Изнајмувачи со срце“, која се прошири по социјалните мрежи со брзина на светлината.
- Со помислата дека и децата во Македонија со пречки во развојот заедно со нивните родители заслужуваат помош и одмор, ја оформив оваа група со медиумска поддршка на Петре Димитров. Оваа иницијатива им е наменета пред сѐ на децата со пречки во развојот и телесен инвалидитет, чии родители се во загрозена социјална состојба. Тие имаат големи трошоци за да им ја олеснат состојбата на своите деца и најчесто не можат да си дозволат одмор. Наменета е и за децата со самохрани родители и за социјално загрозени семејства. За третите сѐ уште е неостварлива идејата бидејќи се потребни многу спонзори за превоз низ цела Македонија, угостителски објекти и парична помош, бидејќи тие и да добијат бесплатно сместување, не можат да го искористат поради трошоците што ќе ги имаат за превоз и за храна – објаснува Милкиќ.
Таа е изненадена што за кусо време граѓаните многу се заинтересирале за иницијативата. Во групата секојдневно пристигнуваат пораки за благодарност и поддршка, а тоа на сите многу им значи. Досега најмногу се пријавиле родители на деца со аутизам и Даунов синдром, родители на деца со посебни потреби и самохрани родители.
Се прават списоци, се одбираат приоритетните семејства
На повикот веднаш се пријавиле повеќе сопственици на сместувачки капацитети, раскажува Јасна. Најбројни се луѓето од туристичките места Охрид, Дојран и од Берово. Од Охрид тоа се вилите „Лидија“ и „Вишни“, апартманите „Сион“, „Џими“ и „СараГа“, хотелот „Коцарев“,*Hello Travel и „Галеб“, хотелот „Македонија-Макоил“ од Дојран и куќата „Амика“ од Берово.
- Особено ми е драго што веднаш се пријавија луѓе со срце големо како планина и посебна чест ми претставува да ги споменам и јавно да им се заблагодарам за нивната добрина и великодушност – вели Милкиќ.
Патувањата полека се организираат, се прават списоци. Администраторите ги разгледуваат сите пријавени семејства и ги одбираат приоритетните.
- За жал, тешко се обезбедуваат места каде што ќе можат да престојуваат деца со телесен инвалидитет и затоа апелираме да се пријават хумани издавачи на сместување кои ќе помогнат и за вакви случаи – вели Јасна.
Каде се институциите?
На групата деновиве администраторите напишаа дека од сите пријавени ќе бараат да достават финансиска состојба бидејќи се пријавувале и граѓани што не се загрозени. На прашањето дали има обиди за злоупотреба на хуманитарната акција, Јасна вели:
- За жал, постојат луѓе што сакаат да ја злоупотребат оваа иницијатива. Има родители што веќе ги носеле своите деца на одмор и сакаат да ја искористат и оваа бесплатна услуга за сместување. Но, со толку љубов и труд работиме за успешно да ја реализираме оваа идеја што нема да дозволиме да се случуваат какви било искористувања и неправди. Се извинувам што ќе бидеме малку строги во селекцијата на семејства што ќе бидат угостени, но сметам дека тоа ќе биде најобјективен избор, без никаква дискриминација. Сакаме да биде долгорочна иницијатива и да важи во текот на целата година. Ни треба голема поддршка од сопствениците на хотели, апартмани и викенд-куќи. Но, потребни ни се и спонзорства од ресторани, маркети и од сите луѓе што можат да помогнат. Навистина сакам да допреме до срцата на сите луѓе и да бидеме причина за детските насмевки – вели Јасна.
Оваа граѓанска иницијатива за кусо време направи многу. На прашањето каде се државата и институциите што постојат за да им помагаат на ранливите категории, таа вели:
- Групата постои неколку дена и полека ја будиме свеста кај луѓето да обрнат поголемо внимание на децата со посебни потреби и болните деца. Сакаме да престанат сите дискриминирања кон нив и луѓето да престанат да ги гледаат чудно. Треба да бидеме благодарни за нашето здравје и несебично да им помагаме на оние на кои најмногу им треба. Што се однесува до институциите, не сакам да зборувам за нивото работење и залагање. Оставам луѓето сами да пресудат.