Во Тетово деновиве имало барања од граѓани да им се дозволи со скафандери и целосна заштитна опрема да влезат во болницата и да им помогнат на своите блиски што се болни од Ковид-19. Министерот за здравство Венко Филипче на денешната прес-конференција одговори:

- Иако би биле заштитени, сепак ризикот е голем. Мобилизирани се сите медицински сестри во земјава. Свесен сум дека и досега се случувало присуство на членови од семејство, тоа е дел од нашата култура на живеење. Но, кон оваа патологија мора да бидеме повнимателни - рече Филипче.

Тој рече дека засега нема потреба да се мобилизираат матичните лекари на инфективните клиники, бидејќи тие комуницираат со пациентите и ги советуваат и лекуваат во првата фаза од болеста. Матичните лекари работат според препораки и постапуваат според клиничка слика и состојба на секој пациент поединечно. Како се менува состојбата на пациентот, така матичниот лекар ја адаптира терапијата.