Тренд што се шири низ Европа: Данска ја помести старосната граница за пензија на 70 години

Парламентот на Данска минатата година усвои закон со кој старосната граница за целосна пензија за лицата родени по 31 декември 1970 година се зголемува на 70 години. Тоа значи дека граѓаните родени во 1971 година и подоцна ќе можат да се пензионираат дури во 2041 година.

Со оваа мерка Данска ќе ја престигне Грција и ќе стане земја со најдолг работен век во Европската Унија.

Пензијата врзана со животниот век

Данска уште во 2006 година ја поврза старосната граница за пензионирање со очекуваниот животен век, при што таа се ревидира на секои пет години. Во моментов границата е 67 години, но се очекува по 2070 година да достигне дури 74 години.

Во меѓувреме, Грција се движи кон граница од околу 68,5 години до 2030 година.

Поддршка и економска логика

Реформата е поддржана од водечките политички партии во Данска со цел да се зачува одржливоста на системот на социјална заштита и да се намали притисокот врз јавните финансии.

Според Организација за економска соработка и развој, до 2060 година возраста за пензионирање во Европската Унија ќе се приближи до 67 години, а сè повеќе земји ќе ја надминат границата од 70 години.

Причината е јасна, Европејците живеат сè подолго. Просечниот животен век во ЕУ за родените во 2024 година достигнал 81,5 години, што значи дека многу луѓе поминуваат повеќе од 30 години во пензија.

Критики: „Не можеме да работиме засекогаш“

Сепак, реформата предизвика и незадоволство кај дел од граѓаните. Многумина сметаат дека не е реално сите да работат до 70 години, особено оние со физички тешки работи.

- Физички напорните работи тешко може да се извршуваат до 70 години. Не треба сите да имаат иста старосна граница - велат критичарите, посочувајќи дека подолг живот не значи нужно и подолго здравје.

Споредби во Европа

Иако Данците немаат највисок животен век во Европа (околу 82 години), нивниот работен век е најдолг. На пример, Шпанија и Шведска имаат подолг животен век, додека Хрватска сè уште ја задржува границата за пензија на 65 години.

Светска банка предупредува дека многу европски земји се соочуваат со структурни проблеми, како што се стареење на населението и сè помал број работници кои ги финансираат пензиите.

Различни пристапи

За разлика од Данска, некои земји се фокусираат на други мерки, како што е зголемување на пензиите, поттик за подолго останување во работен однос и можност за работа по пензионирањето наместо директно зголемување на старосната граница.

Извор: 6yka.com
Фото: Freepik