По 150 години, во Финска згаснаа и последните аналогни фиксни телефони

Во Финска беше упатен последниот повик од фиксен телефон, со што оваа нордиска земја стана поновата во низата земји што ги повлекуваат телефоните со бакарни жици во корист на оптичките кабли.

Финска во вторникот, по речиси 150 години, ги исклучи аналогните фиксни телефонски повици, со што стана најновата земја која напредува во глобалната транзиција кон дигитална инфраструктура.

Естонија, Холандија, Норвешка и Шпанија веќе го направија овој чекор.

Мрежата на фиксни линии во Финска почна да работи во 80-тите години на 19 век, но како и секаде во светот, дигиталната револуција ја голтна старата технологија базирана на бакарни жици. Нордиската земја, која е дом на пионерот за мобилни телефони „Нокиа“, веќе одамна забележа дека мобилната технологија целосно ја презеде употребата на фиксните телефони.

„Елиса“, последниот голем телеком-оператор со фиксна мрежа од бакарни жици во земјата, го означи крајот на оваа услуга со повик помеѓу извршниот директор на компанијата, Топи Манер, и Јарко Саримаки, шеф на државната агенција за комуникации и транспорт.

Тие разговараа за своите спомени со фиксните телефони, при што Манер се присети на тинејџерските денови во Лондон во 80-тите, кога се јавувал дома еднаш неделно во точно договорено време за да биде сигурен дека целото семејство е таму.

Тие разговараа и за иднината на мобилните технологии, пред да го завршат повикот со секојдневното „кулемин“ (kuulemiin), што на фински значи „се слушаме подоцна“.

Зошто телефоните со „бакарни жици“ се аналогни?

Бакарните жици, тип на кабли што се користат во фиксната телефонија повеќе од еден век, можат да пренесуваат само ограничено количество податоци. Тие ги пренесуваат телефонските повици како континуиран електричен сигнал што го имитира оригиналниот звучен бран, што всушност ги прави аналогни.

Телефонските повици и интернет-сообраќајот сè повеќе се префрлаат на оптички кабли, кои користат тенки стаклени нишки за пренос на информации во форма на светлосни импулси, овозможувајќи далеку побрзи и посигурни врски.

Кога во јануари ја објави одлуката за повлекување на мрежата, потег што нејзините конкуренти веќе го имаа направено, компанијата „Елиса“ соопшти дека нејзините корисници имаат уште само „неколку илјади“ договори исклучиво за фиксна линија, а нови договори со години не биле продадени.

Од вторникот, само локалните оператори ќе нудат пакети за фиксна телефонија во Финска, опслужувајќи неколку илјади корисници кои зависат од локалните повици.

Извор: Euronews.com
Фото: Screenshot/YouTube