Германците во зима ја применуваат оваа метода за проветрување на домот

Штом почнува грејната сезона, прозорците се затвораат, а станот за неколку дена може да добие тежок и лош мирис. Во Германија за тоа постои едноставно решение наречено „Stoßlüften“ - кратко и интензивно проветрување. Прозорецот се отвора ширум неколку минути, а потоа се затвора. Во зима тоа е доволно за воздухот во просторијата да биде свеж, а ѕидовите и мебелот да не стигнат да се изладат.

Ваков начин на проветрување не само што го подобрува квалитетот на воздухот, туку помага и во спречувањето на насобирањето на влагата и појавата на мувла. Германците го применуваат во текот на целата година, но времетраењето на проветрувањето го приспособуваат на надворешната температура.

Правило: Ширум отворен прозорец, кратко и неколку пати дневно

Германската советодавна организација „Ко2онлајн“ препорачува проветрување три до четири пати дневно, секогаш со целосно отворен прозорец. Колку долго прозорецот треба да остане отворен, зависи од годишното време, колку е постудено надвор, толку е побрза размената на воздухот.

Препорачано времетраење на проветрувањето:

Од декември до февруари: околу 5 минути;
Во ноември и март: околу 10 минути;
Во октомври и април: од 15 до 20 минути;
Во текот на летото: до 30 минути.

Најбрза размена на воздухот се постигнува кога истовремено ќе се отворат прозорците на спротивните страни од станот, со што се создава провев. Германците ја нарекуваат оваа техника „Querlüften“.

Германската агенција за заштита на животната средина наведува дека во зима може да биде доволно и пет минути проветрување, во зависност од надворешната температура и јачината на ветерот.

Навики што помагаат воздухот во станот да биде свеж

Веднаш отстранете ја пареата од просторијата - По туширањето или готвењето, потребно е веднаш да се отвори прозорецот. Вратата од бањата и кујната треба да се држат затворени за влагата да не се шири во другите простории.

Избегнувајте сушење алишта во спалната соба - Ако алиштата мора да ги сушите во станот, просторијата во која се наоѓаат треба почесто да се проветрува, со целосно отворен прозорец. Сушењето алишта ослободува големо количество влага што може да придонесе за создавање мувла.

Контролирајте ја влажноста на воздухот - Релативната влажност на воздухот во станот би требало да биде меѓу 40 и 60 отсто. Кога влажноста е долготрајно зголемена, се зголемува ризикот од појава на мувла. Најједноставен начин да ја проверите влажноста е користење хигрометар, уред што го мери нивото на влага во воздухот.

Не дозволувајте просториите да бидат премногу ладни - Дури ни собите што не се користат не би требало да се оставаат целосно незагреани. Се препорачува температурата во нив да не паѓа под 16 Целзиусови степени бидејќи на ладните ѕидови полесно се кондензира влагата.

Редовното проветрување, соодветната температура и контролата на влажноста се едноставни навики што можат да помогнат воздухот во станот да остане свеж, а просториите заштитени од појава на мувла.

Извор: Nova.rs
Фото: Magnific