Научниците откриле 140.000 вируси во човечкото црево, од кои повеќето не се познати

Научниците откриле 140.000 вируси во човечкото црево, од кои повеќето не се познати

Подготвил: Тамара Гроздановски

Лектор: Ивана Кузманоска

Пандемијата на коронавирусот го фокусира погледот на светот кон вирусите, но новите докази откриваат дека луѓето никогаш не го забележуваат огромниот обем на вирусите - дури и кога се во нас.

Нов проект со база на податоци составена од научници идентификувал над 140.000 вирусни видови што живеат во човечкото црево - гигантски каталог што е уште позачудувачки со оглед на тоа што над половина од овие вируси претходно не биле познати за науката.

- Ако десетици илјади новооткриени вируси звучат како алармантен развој, тоа е сосема разбирливо. Но, не треба погрешно да протолкуваме што всушност претставуваат овие вируси во нас - велат истражувачите.

- Важно е да се запомни дека не сите вируси се штетни, туку претставуваат интегрална компонента на екосистемот на цревата - објаснува биохемичарот Александре Алмеида од Институтот за биоинформатика на Европска лабораторија за молекуларна биологија (ЕМБЛ-ЕБИ) и Институтот „Велком Сангер“.

- Овие примероци доаѓаа главно од здрави индивидуи кои не споделуваа никакви специфични болести - додава тој.

1
Фото: Spencer Phillips/EMBL-EBI

Новиот каталог на вируси - наречен „Gut Phage Database“ (GPD) - бил усогласен со анализа на над 28.000 индивидуални метагеноми - јавно достапни записи за ДНК-секвенционирање на примероци од цревни микробиоми собрани од 28 земји - заедно со речиси 2.900 референтни геноми на култивирани цревни бактерии.

Резултатите откриле 142.809 вирусни видови кои престојуваат во човечкото црево, меѓу кои се наоѓа и специфичен вид на вирус познат како бактериофаг, кој инфицира бактерии, покрај едноклеточните организми наречени археи.

Во мистериозната средина на микробиомот на цревата - населена со мешавина од микроскопски организми, опфаќајќи ги и бактериите и вирусите - се смета дека бактериофагите играат важна улога, регулирајќи ги и бактериите и здравјето на самите човечки црева.

- Бактериофагите длабоко влијаат врз микробиолошките заедници функционирајќи како вектори на хоризонтален трансфер на гени, кодираат дополнителни функции од корист за домаќинот на бактериските видови и промовираат динамични коеволутивни интеракции - пишуваат истражувачите во нивниот нов труд.

- Долго време нашето знаење за овој феномен беше закочено од ограничувањата во разбирањето на видовите бактериофаги - пишува во трудот.

Во последниве години новите достигнувања во метагеномските анализи значително ја проширија нашата свест за вирусната сорта што ја разгледуваме овде - и можеби ништо повеќе од базата на податоци за цревни фаги што истражувачите ја опишуваат како масовно ширење на различноста на човечките цревни бактериофаги.

- Според наши сознанија, овој сет претставува досега најсеопфатна и најкомплетна колекција на геноми на човечки цревни фаги - пишуваат авторите на истражувањето.

Истражувањето покажува дека над една третина (36 отсто) од идентификуваните вирусни групи не се ограничени на заразување на еден вид бактерии, што значи дека тие можат да создадат мрежи за проток на гени низ филогенски различни бактериски видови.

- Истражувањето на бактериофагите во моментов доживува преродба. Овој висококвалитетен каталог со големи размери на хумани цревни вируси доаѓа во вистинско време да послужи како нацрт за водење на еколошка и еволутивна анализа во идните студии за вироми - вели микробиологот Тревор Лоули од Институтот „Велком Сангер“.

Извор: Science Alert
Фото: