Над 200 педијатри, здруженија и образовни институции бараат од „Гугл“ и „Јутјуб“ да ги отстранат ВИ генерираните видеа
Повеќе од 200 експерти бараат од „Гугл“ и „Јутјуб“ да ги забранат масовно продуцираните ВИ содржини за деца, предупредувајќи на штетните последици врз детскиот развој и вниманието.
„Јутјуб“ со години се обидува да изгради имиџ на безбедна платформа за најмладите, но новиот бран на содржини генерирани од вештачка интелигенција предизвика остри реакции од јавноста. Голема група експерти за детски развој бараат од „Гугл“ итна интервенција, па дури и целосна забрана за препорачување такви видеозаписи.
Повеќе од 200 педијатри, здруженија за заштита на децата и образовни институции упатија отворено писмо до извршниот директор на „Гугл“, Сундар Пичаи, и до челникот на „Јутјуб“, Нил Мохан. Во писмото се бара отстранување на ВИ генерираните видеа од алгоритамските препораки на стандардниот „Јутјуб“, како и на специјализираната апликација „Јутјуб кидс“. Експертите се особено остри кон масовно продуцираната содржина со низок квалитет, популарно наречена ВИ ѓубре, чија единствена цел е задржување на вниманието, без никаква вистинска едукативна вредност.
„Неконтролиран експеримент“ над најмладите
Загриженоста на експертите оди многу подлабоко од самиот квалитет на видеото. Во писмото се предупредува дека таквата содржина може негативно да влијае врз вниманието на децата и да ја замагли чувствителната граница меѓу реалноста и фикцијата. Покрај тоа, се нагласува добро познатиот проблем на модерното родителство - времето поминато пред екраните сè повеќе ги истиснува вистинската игра и социјалната интеракција во физичкиот свет.
Потписниците тврдат дека „Јутјуб“ во моментов спроведува еден вид „неконтролиран експеримент“ над децата, агресивно промовирајќи ВИ содржини без никакви научни докази за нивната корист или безбедност за детскиот развој.
Од „Јутјуб“ порачуваат дека не го игнорираат проблемот
Портпаролот на компанијата изјави дека ВИ генерираната содржина на „Јутјуб кидс“ сега се ограничува на тесен круг проверени канали, со строга обврска креаторите јасно да ги означат видеозаписите создадени со вештачка интелигенција. Исто така, компанијата тврди дека нејзиниот систем автоматски го отстранува масовно продуцираниот спам. Меѓутоа, критичарите сметаат дека тие мерки едноставно не се доволни.
Ситуацијата дополнително се комплицира од двосмислената порака што пристигнува од „Гугл“. Иако се соочува со барања за построга регулација, „Гугл“ неодамна инвестира во Animaj - ВИ анимациско студио специјализирано за продукција на јутјуб-видеа за помлада публика. Авторите на писмото предупредуваат дека ваквите деловни потези охрабруваат дополнително време пред екраните, што е особено загрижувачки кога станува збор за „бебиња и мали деца кои воопшто не би требало да бидат изложени на екрани“.
Фото: freepik