Дали ја знаете методата за купување 5-4-3-2-1 која нема да ви го испразни паричникот?

Одењето во продавница по намирници не мора да биде обврска што ви ја троши енергијата и ви го празни паричникот. Иако купувањето без список може да доведе до прекумерно трошење, за многумина и самото составување список е заморно. За да ги заобиколат овие проблеми, корисниците на социјалните мрежи ја популаризираа методата 5-4-3-2-1, создадена да го поедностави купувањето намирници.

Што претставува оваа метода?

Овој трик, кој го популаризира готвачот Вил Колман, се базира на поврзување на секој број со одредена група храна за купувањето да биде полесно. Според оригиналната идеја на Колман, методата вклучува купување:

5 различни видови зеленчук,
4 вида овошје,
3 различни извори на протеини,
2 соса или намази и
1 вид житарки.

Покрај тоа, се препорачува да се почестите со нешто благо.

Сепак, постојат и други верзии на ова правило. На пример, постои и ваква верзија:

5 вида зеленчук,
4 извори на протеини,
3 вида овошје,
2 вида јаглехидрати и
1 благо.

Суштината на оваа метода не е слепо да се придржувате до правилата, туку да ја приспособите на сопствените навики, потреби и домашниот буџет. Некој една недела ќе купи повеќе овошје, а помалку зеленчук, друг ќе замени сос со друг вид житарки или јаглехидрати.

Свесно купување

Методата е осмислена како флексибилна рамка за креирање список за купување што одговара на вашите потреби. Ако една недела купите пет вида овошје наместо зеленчук или го промените бројот на сосови и житарки, тоа е сосема во ред. За оние што купуваат за семејство, веројатно ќе бидат потребни поголеми количини од одредени намирници, но структурата на списокот останува иста.

Главната цел не е заштеда на пари со купување поевтини производи, туку развивање свесен пристап кон купувањето. Наместо да купувате кога сте гладни и да ставате сè што ќе ви се допадне во кошничката, оваа метода ви помага да направите конкретен план за оброци за целата недела.

Кога ја користите оваа метода, корисно е однапред да ги испланирате оброците, така што секој оброк ќе содржи протеини, јаглехидрати и зеленчук. Исто така, практично е да користите рецепти со исти состојки. На пример, ако купите пилешко како извор на протеини и ориз како јаглехидрати, можете да ги искористите за две различни вечери само со промена на видот на зеленчукот.

Треба да се напомене дека вашата конечна листа за купување веројатно ќе содржи повеќе од 16 производи. Речиси секогаш ќе ви требаат дополнителни состојки за одредени рецепти или основни домашни производи што треба да се дополнат. Овие производи се сметаат за „дополнителни артикли“ надвор од основната структура.

Затоа, методата 5-4-3-2-1 треба да се користи како почетна точка и насока, а не како строго правило. Нејзината цел е да обезбеди структура и да го олесни процесот, а не да наметне ограничувања.

Извор: BIZlife.rs
Фото: Freepik