„Теорија на 7 пријатели“ - како различните видови пријателства влијаат врз нашата психа

Едно лице не може да ги исполни сите наши емоционални, социјални и психолошки потреби. Токму од таа идеја настана популарната теорија од социјалните мрежи позната како „теорија на 7 пријатели“.

Што е „теорија на 7 пријатели“?

Оваа теорија посочува дека за исполнет друштвен живот е доволно да имате седум пријатели, од кои секој има специфична улога во вашиот живот - од пријател од детството, преку лице на кое му ги доверувате сите тајни, до оној што секогаш ве смее.

„Теоријата на 7 пријатели“ стана популарна благодарение на социјалните мрежи, со основна порака дека не треба сите емоционални потреби да се насочуваат кон едно лице. Според овој концепт, оптималниот круг на пријатели го сочинуваат седум типа:

- пријател од детството
- пријател кој секогаш ве смее
- пријател со кого можете долго да не комуницирате, а односот останува ист
- пријател на кого можете сè да му кажете
- пријател кој е како член на семејството
- пријател без кого не можете да си го замислите животот
- пријател кој ги слуша сите ваши љубовни проблеми.

Оваа поделба укажува на важен факт - емоционалното потпирање на едно лице може да биде преоптоварувачко и за вас и за него.

Пријател од детството

Ова лице ве познава низ различни фази од животот. Постои длабоко чувство на сигурност и континуитет што произлегува од заедничкото минато.

Пријател кој секогаш ве смее

Тоа е лице кое внесува леснотија во вашиот живот. Во моменти на стрес или напнатост, ваков пријател може да помогне да се опуштите и да ја промените перспективата.

Пријател со кого контактот не е чест, но односот останува ист

Без оглед на времето и оддалеченоста, односот останува стабилен. Ваквите пријателства често укажуваат на високо ниво на меѓусебно разбирање.

Пријател на кого можете сè да му кажете

Ова лице претставува сигурно место за изразување на емоциите. Довербата, прифаќањето и дискрецијата се клучни карактеристики на овој однос.

Пријател кој е како член на семејството

Границите меѓу пријателството и семејниот однос се минимални. Постои чувство на трајност, блискост и целосна спонтаност.

Пријател без кого не можете да си го замислите секојдневието

Ова лице има значајна улога во вашиот живот и често е вклучено во важни одлуки и настани.

Пријател за љубовни проблеми

Иако е вообичаено да ги споделуваме емотивните предизвици со блиски лица, важно е да се обрне внимание на рамнотежата. Претераното потпирање на еден пријател за емоционална поддршка може да доведе до нерамнотежа во односот.

Психолошко влијание на пријателствата

Истражувањата покажуваат дека социјалната изолација може да има негативно влијание врз менталното здравје. Од друга страна, стабилната мрежа на пријателства може значајно да го унапреди квалитетот на животот, особено со годините.

Важно е да се разбере дека „теоријата на 7 пријатели“ не е универзално правило. Поради обврските, животните околности и личните преференции, многу луѓе немаат голем број блиски пријатели и тоа е сосема во ред.