Швајцарија размислува да ја ограничи брзината на автопатите на 80 км/ч

Поради проблеми во снабдувањето со гориво, Швајцарија веќе разгледува можности за заштеда преку намалување на брзината на сообраќајот.

Овој план би можел да влијае и врз домашните и врз сите други возачи, но одлуката за неговото воведување сè уште не е донесена.

Доколку проблемите со снабдувањето со гориво продолжат да се влошуваат, возачите на автопатиштата во Швајцарија би можеле да возат само 80 километри на час наместо досегашните 120.

Проблемот е првенствено предизвикан од тешкотии во дотурот на гориво во Швајцарија. Поради долготрајниот низок водостој на реката Рајна, бродовите можат да пловат само со значајно намален товар или воопшто нема да можат да пловат.

Изгубените транспортни капацитети делумно се надоместуваат со железничкиот и патниот превоз, како и со нафтоводите. Меѓутоа, во таква ситуација секое ново нарушување дополнително ја влошува состојбата.

Овие проблеми истовремено доведоа до привремен недостиг на дизел. За да се надмине ситуацијата, до 22 ноември е овозможен пристап до постојните резерви на дизел, од кои биле достапни 45 милиони литри гориво.

Целта на намалувањето на брзината на сообраќајот е намалување на потрошувачката на гориво, но сè уште нема јавно потврдени податоци за тоа какви заштеди би донела оваа мерка.

Надлежната агенција наведува дека владата, пред воведувањето построги мерки, би можела да ги поттикне граѓаните на доброволна заштеда на гориво, поекономично возење и почесто користење на јавниот превоз.

Извор: 021.rs
Фото: Pixabay