Што е „вајлдфлауеринг“ - новиот љубовен тренд кај генерацијата З

Најновиот тренд во запознавањето кај генерацијата З се заснова на поставување одредени правила и следење на тоа како понатаму ќе се развива односот.

Овој тренд го носи името „вајлдфлауеринг“ и ги поттикнува слободните луѓе да ѝ дозволат на романтиката да се развива природно, без временски ограничувања и без притисок однапред да се дефинира во која насока ќе оди врската.

Концептот е едноставен - наместо да се обидувате да ја вклопите врската во однапред зададени рамки, треба да ѝ дозволите да се развива со свое темпо. За луѓето што се изморени од современото запознавање, експертите велат дека ваквиот пристап може да биде вистинско олеснување.

Ејми Чен, тренер за љубовни односи, вели дека овој пристап може да биде особено корисен за луѓето што секој прв состанок го доживуваат како разговор за брак.

- Ако сте личност која уште на првиот или вториот состанок почнува да размислува за иднината и дали таа личност би можела да биде ваш партнер или родител на вашите деца, тогаш веројатно би ви користел поопуштен пристап - вели таа.

Чен нагласува дека излегувањето на состаноци не треба да биде трка кон одредена цел, туку можност за љубопитност, подобро запознавање и откривање што навистина барате од партнерот. За луѓето што брзаат да влезат во врска, може да биде корисно да забават.

Исто така, малку спонтаност може да ги направи состаноците поинтересни и позабавни. Експертите наведуваат дека за генерација која сѐ повеќе се заморува од апликациите за запознавање, нејасните љубовни односи и строгите правила во врските, лесно е да се разбере зошто овој тренд станува толку привлечен.

Извор: Klix.ba
Фото: Screenshot/YouTube