ЕУ објави упатства за граѓаните: Спремете ранец за евакуација и резерви за 72 часа
Европската комисија ги претстави новите насоки со кои ги повикува граѓаните на Европската Унија на подобра подготовка за вонредни ситуации и катастрофи. Тоа вклучува подготовка на резерви од храна, вода и основни потреби кои се доволни за преживување во текот на првите три дена додека не пристигне организирана помош од јавните служби.
Насоките на Европскиот форум за цивилна заштита во Брисел ги претстави европската комесарка за подготвеност и управување со кризи, Хаџа Лахбиб. Таа истакна дека во кризни моменти првите часови ја прават клучната разлика и дека секој граѓанин мора да знае како да го заштити своето семејство и да им помогне на другите, нагласувајќи дека подготовката започнува во сопствените домови, училишта и локални заедници.
Ранец за евакуација и резерви за 72 часа
Главниот фокус на препораките е ставен на тридневната самоодржливост. Комисијата им советува на граѓаните во домаќинствата да имаат подготвено основни резерви, како и однапред спакувана торба или ранец за итни случаи со најнужните работи во случај на брза евакуација, за да можат да ги задоволат основните потреби.
Освен резервите за домаќинствата, насоките опфаќаат уште три клучни области: воведување едукација за кризи во детските градинки и основните училишта преку активности приспособени на возраста и без создавање страв, потоа посебни мерки за заштита на лицата со инвалидитет за никој да не биде запоставен, како и појасно и побрзо комуницирање на опасностите од страна на властите кон јавноста.
Што треба да подготвите за првите 3 дена од кризата?
• Вода за пиење: 6-9 л по лице.
• Нерасиплива храна: резерви за 3 дена.
• Лекови и прва помош: редовна терапија.
• Светилка и батерии
• Радиоприемник, на батерии или навивање.
• Преносен полнач за мобилен.
• Документи и готовини во водоотпорна кесичка.
• Топла облека и алат за брза евакуација.
• Вода за пиење: 2-3 л дневно
Обезбедете минимално 2 до 3 литри пивка вода во шишиња по член на домаќинството за секој од трите дена, со дополнителна резерва за основна хигиена и за домашни миленици.
Од 2027 година се воведува Европски ден на подготвеност
Комисијата предложи и воведување официјален Европски ден на подготвеност, кој секоја година би се одбележувал на 23 октомври, почнувајќи од 2027 година. Тој датум е избран бидејќи го означува основањето на европскиот Механизам за цивилна заштита во 2001 година, а целта му е да ги поттикне граѓаните и локалните власти на редовно вежбање и подигнување на свеста за опасностите.
Предлогот произлезе и од препораките на панелот на европските граѓани, во кој 150 жители од сите членки на Унијата побараа посилно вклучување на јавноста во системите за заштита и спасување.
Стрес-тестови за службите за цивилна заштита
Покрај упатствата за граѓаните, Брисел донесе и препораки за државите членки за спроведување редовни стрес-тестови и планови за континуитет во работата. Од националните центри за цивилна заштита се бара да обезбедат непречена работа и координација на помошта 24 часа дневно, дури и во услови на тешки нарушувања како што се снемување струја, пад на комуникациските мрежи или сајбер-напади.
Иако новите насоки не се правно обврзувачки, тие се клучен дел од пошироката европска стратегија за зајакнување на отпорноста на кризи. Стратегијата се темели на минатогодишниот извештај на поранешниот фински претседател Саули Ниинисте, кој предупреди дека Европа, поради сè почестите климатски непогоди и геополитички закани, мора да изгради култура на подготвеност во сите слоеви на општеството.
Фото: magnific