Околу 300 милиони ученици не одат на училиште поради Ковид-19

Речиси 300 милиони ученици во светот не одат на училиште, а Италија е последна во низата земји кои затвораат училишта со цел да го запрат ширењето на новиот коронавирус.

Италија, која е првото жариште на Ковид-19 во Европа, денеска ги затвори сите училишта и универзитети до 15 март.

Во Јужна Кореја, второто најголемо жариште после Кина, училиштата и градинките ќе бидат затворени уште три недели.

Во Иран исто така се затвораат училишта, се откажуваат културни и спортски настани, а работното време во државната администрација е скратено.

Вкупно 13 земји поради епидемијата мораа да затворат училишта, што погоди 290 милиони ученици низ светот, соопшти УНЕСКО истакнувајќи дека се работи за досега невидени бројки.

Од УНЕСКО нагласија дека работат со цел итно да се реагира на Ковид-19. Организацијата ќе продолжи да ја следи големината, обемот и географското ширење на затворањето на училиштата и е подготвена да им даде поддршка на државите за усвојување соодветни инклузивни мерки.