Апел до црквата во Германија да не благословува невеганска храна

Германската организација за заштита на животните ПЕТА ги повика црковните старешини во Германија да одбијат да даваат благослов за невеганска храна во своите епархии.

За христијаните, велигденското јајце е симбол на Христовото воскресение и самиот живот, а за Велигден, и католиците и православните имаат обичај да побараат од свештеник благослов за јајца и друга храна што се служи на празничните трпези.

- Јавно ги повикуваме германските епархии да размислат за овој ритуал во светлината на христијанските вредности на црквата и во иднина да даваат благослов само за производи од растително потекло. Традицијата никогаш не може да го оправда страдањето на животните - изјави портпаролката на ПЕТА, Јулија Вајбел.

Според неа, производите од растително потекло, како овошје и зеленчук, леб, колачи или рен, би покажале дека црквата ја проширува својата љубов и кон животните што се експлоатираат на фармите.

Претставниците на германската католичка црква одбиле да го коментираат овој апел на ПЕТА, но потврдиле дека се разговара за него во црковните кругови.

- Како се очекува од нас да знаеме дали велигденскиот леб е вегански или не - изјавил свештеник од една епархија во Јужна Германија.

Извор: 021.rs
Фото: Freepik