Моделот на „Нетфликс“ за гледање цели сезони слабее, ова му е сѐ поголем конкурент
Моделот на „Нетфликс“ за истовремено објавување цели сезони, кој пред речиси 15 години ја промени телевизиската индустрија, полека слабее, додека гледаноста на продолженијата на одделни популарни серии значително опаѓа, а „Јутјуб“ презема сè поголем дел од вниманието на публиката.
Анализата на неколку успешни наслови на „Нетфликс“, меѓу кои се „Еден дел“, „Ноќниот агент“ и „Аватар: Последниот господар на воздухот“, покажа дека гледаноста на нивните втори сезони паднала меѓу 30 и 70 отсто, со дополнителен пад во третите сезони.
„Нетфликс“ минатата недела најави дека податоците за гледаноста отсега ќе ги објавува само еднаш годишно, откако минатата година престана квартално да известува за растот на бројот на претплатници.
Некои телевизиски продуценти предупредуваат дека големата финансиска понуда на „Нетфликс“ често доаѓа со ризик серијата да биде откажана по само една или две сезони.
Истражувањето на компанијата „Ампер“ покажува дека „Нетфликс“ не е единствената стриминг-платформа што брзо укинува содржини. Повеќето големи платформи најчесто ги прекинуваат сценарските програми по втората или третата сезона, додека традиционалните емитери главно ги задржуваат сериите до петтата или шестата сезона.
„Нетфликс“ во последните три години одлучуваше за судбината на околу 180 сценарски програми еднаш годишно, а просечната стапка на откажување изнесуваше приближно 22 отсто, слично како и кај другите светски стриминг-компании.
Поранешниот раководител на Би-би-си и Ај-ти-ви, Питер Финчам, оцени дека традиционалното телевизиско емитување дава поголема можност сериите постепено да изградат публика, додека стриминг-платформите ги носат одлуките првенствено врз основа на податоците за гледаноста.
„Нетфликс“ повремено отстапува од моделот на објавување цела сезона одеднаш. Епизодите од серијата „Почудни нешта“ беа објавувани во неколку дела, додека „Љубовта е слепа“ излегуваше неделно. Конкурентите „Дизни+“, Ејч-би-о и „Епл ТВ“ остварија успех со побавно, неделно објавување на сериите.
Загриженоста на инвеститорите се засили откако „Нетфликс“ понуди 83 милијарди долари за студискиот и стриминг-делот на „Варнер Брос дискавери“, што беше прв голем обид на компанијата да ја прошири содржината со купување друга компанија.
Најголема закана за класичните стриминг-сервиси сè повеќе претставува „Јутјуб“.
Податоците на компанијата „Дигитал-и“ покажуваат дека просечното дневно гледање на „Јутјуб“ минатата година првпат го надмина „Нетфликс“.
Просечното време на гледање „Јутјуб“ порасна од 87,2 на 99,1 минути дневно по корисничка сметка, додека „Нетфликс“ падна од 100,5 на 93,4 минути.
Извор:
6yka.com
Фото: Magnific