Научниците одгледаа човечка очна леќа од матични клетки

Научниците првпат одгледаа човечка очна леќа од матични клетки, што потенцијално би можело да отвори пат кон нови методи на лекување очни болести. Во новиот научен напредок, истражувачите од Универзитетот „Англија Раскин“ (АРУ) во Обединетото Кралство создадоа „мини леќи“ во лабораториски услови.

Тимот, кој вклучува и експерти од Универзитетот во Кардиф и Универзитетот во Осака (Јапонија), наведува дека тие леќи многу ја копираат функцијата на природната леќа во човечкото око.

Се очекува новите леќи да можат да се користат за тестирање нови лекови и подобро разбирање на очните болести.

Истражувачите истакнуваат дека тие леќи би можеле да придонесат за развој на идни регенеративни терапии бидејќи можат да копираат одредени природни регенеративни процеси што се одвиваат за време на развојот на леќата.

Професорката Барбара Пјершчонек од Центарот за биомедицина и здравствени иновации при АРУ изјави: „Ова е голем напредок бидејќи е исклучително тешко да се прибави и проучува ткивото од леќата на човечкото око додека тоа се развива“.

- Успеавме во лабораторија да одгледаме минијатурно ткиво на човечка леќа од матични клетки и да ги утврдиме условите потребни за тоа што поверно да наликува на природната човечка леќа. Како што ќе се развива технологијата, ткивата одгледани во лабораторија би можеле да ни помогнат во тестирањето нови лекови, подобро разбирање на болестите што влијаат врз видот и потенцијално да придонесат за развој на идни регенеративни терапии - рече таа.

Истражувачите користеле возрасни клетки кои биле репрограмирани во состојба слична на матични клетки.

Универзитетот АРУ наведе дека научниците потоа развиле метод на одгледување кој ги поттикнал клетките да се организираат во структури слични на очна леќа. Авторите известија дека тие структури поседуваат многу клучни биолошки обележја на вистинските човечки очни леќи.