Почна со работа кинескиот домашен хуманоиден робот кој готви и чисти

Роботот е дизајниран да извршува сложени домашни работни процеси во повеќе чекори.

Кинеската компанија за роботика „Јуникс АИ“ претстави домашен робот управуван од вештачка интелигенција, конструиран за извршување на секојдневните домашни обврски, како што се будење на корисниците, подготовка на оброци, чистење на собите и организирање на предметите.

Роботот, кој е дел од серијата „Пантер“ на оваа компанија, е висок приближно 160 сантиметри и тежи околу 80 килограми. Со едно полнење може да работи од 8 до 16 часа, а поставен е на тркалезна основа што може да се движи во сите насоки, што му овозможува ефикасно да се движи низ домовите, становите и други средини додека извршува задачи со повеќе чекори.

Системот веќе се тестира во вистински домови и услужни објекти, што го нагласува сè поголемиот стремеж кон роботи за домашни услуги со вградени системи на вештачка интелигенција. Овие системи ја комбинираат вештачката интелигенција со физички машини способни да дејствуваат во реалниот свет.

Преглед на техничките карактеристики

Дизајнот со тркала ги подобрува стабилноста и енергетската ефикасност во споредба со двоножните хуманоидни роботи, што го прави попрактичен за затворени простории каде што се важни долгите работни часови и сигурната подвижност.

Роботот вклучува систем за перцепција со двојни камери во боја и камери со сензори, тродимензионален ласерски скенер „Лидар“ и кружна низа од шест микрофони за гласовна интеракција. Неговите две бионички раце можат да подигнат товар до 12 килограми и да дофатат предмети на оддалеченост од речиси еден метар, со прецизност на повторување од ±0,5 милиметри за внимателно ракување со предметите.

Подвижната основа користи систем за погон на четири тркала во сите насоки со ултразвучни сензори и ласерски скенер од 360 степени за навигација, што му овозможува на роботот да се движи низ внатрешни простории и тесни премини.

Сензори, раце и ракување со предмети

Роботот на „Јуникс ВИ“ поседува две роботски раце со повеќе зглобови, што му овозможува да подигнува, преместува и да управува со предмети. Опремен е со камери, сензори и системи за аудиовлез кои му овозможуваат да препознава предмети, да се движи низ просториите и да комуницира со луѓето.

Системот е дизајниран да извршува задачи во повеќе чекори. Тоа значи дека роботот може да заврши низи од задачи, како што се подигнување предмети, нивно складирање, чистење површини и ракување со домашни апарати.

Роботот може да извршува низа домашни задачи - будење на корисниците наутро, приготвување појадок, чистење на собите, организирање на домашните предмети и управување со одредени апарати. Исто така, роботот може да преместува предмети, да ги подредува и да помага во рутинските домашни активности.

Главни предизвици

И покрај напредокот, експертите велат дека домашните роботи сè уште се соочуваат со големи предизвици пред да станат производи за широка потрошувачка.

Домовите се сложени средини со многу предмети, различни услови на осветлување и предмети со разни облици и текстури, што ја прави автоматизацијата потешка отколку во фабриките или магацините. Сепак, примената на роботи способни да извршуваат повеќе домашни задачи сугерира дека концептот на домашен робот кој управува со секојдневните обврски станува сè поблиску до реалноста.



Извор: Interestingengeneering.com
Фото: Screenshot/YouTube