Што значи исклучувањето на Охрид од УНЕСКО, младата Медисон успеа да собере доволно пари за реновирање на тоалетите во медицинското во Битола...

Како на младата Медисон Ристевски од Австралија ѝ успеа да собере повеќе од 34.000 долари за реновирање на тоалетите во средното медицинско училиште во Битола? Што значи исклучувањето на Охрид од листата со културно наследство на УНЕСКО? Зборувавме за предизвиците на студентите на Универзитетот „Св. Апостол Павле“ во Охрид, а разговаравме и со професорката по информатика Жаклина Прекиќ од скопската гимназија „Раде Јовчевски-Корчагин“, која заедно со свои ученици ќе оди на важен натпревар во Њујорк. Ова се дел од темите што ги работевме неделава. Го најавивме и новиот претседател на Сојузот на математичарите на Македонија, проф.Ѓорѓи Маркоски.

Капацитетот на нашите деца и млади е тука, постои, огромен е, и единствено што треба е да се развива доследно и правилно да се насочи во нешто конструктивно, вели Николина Стојанова-Трајковски од секторот за спроведување образовни програмски активности при Фондот за иновации и технолошки развој. Младите во земјава се во фокусот на Фондот - развиени се повеќе програми за поддршка и развој на деца и младинци, а веќе неколку месеци се работи и на подготовка на националната програма наменета за надарени и талентирани деца.
Со години наназад ниедна власт, централна или локална, ресорно министерство или Национална комисија на УНЕСКО, надлежни тела за Охрид и неговата состојба не направи ништо за неговата заштита. Се правеа тела, национални и погранични, правилници, анализи и дебати, но во пракса реално не се направи ништо. Никој не ги зеде предвид предупредувањата од редовните инспекциски надзори од телата на УНЕСКО, а камоли сериозно да се зафати со поправање на грешките. Ниту некој надлежен се охрабри гласно да каже, да алармира дека правецот во кој се менаџира Охридскиот Регион не е погрешен, туку погубен.

Единствените што успеаја да ѝ го привлечат вниманието на јавноста во последно време се активистите на Граѓанската иницијатива „Охрид ЅОЅ“. Група млади луѓе, свесни и за природното и за културното богатство на Охридскиот Регион. За жал, институциите и власта ги слушнаа повиците за ЅОЅ дури пред еден месец, кога Центарот за светско наследство го објави извештајот со нацрт-одлуката и препораката Охридскиот Регион да се стави на листата со светско наследство во опасност.

Професорот треба да умее да ги препознае квалитетите и особеностите на секој ученик и да го поттикне да ги искаже на најдобар можен начин, вели Жаклина Прекиќ, професорка во скопската гимназија „Раде Јовчевски-Корчагин“, чии ученици веќе неколку години победуваат на натпреварите МОЅ (Microsoft Office Specialist) и ACA (Adobe Certified Associate). Во „Корчагин“ предава 15 години, иако има двојно подолг стаж. За себе вели дека е дипломиран инженер по електротехника (насока Информатика и aвтоматика), кој транзицијата во нашава земја го однела професионално во други води, образовни, зашто компјутерскиот центар каде што работела како систем-инженер престанал да постои. Во „Корчагин“ предава програмски јазици (изучување на програмскиот јазик C++), информатика и информатичка технологија.