Скијачот Дардан Дехари го повреди коленото на тренинг, нема да настапи на ЗОИ во Пекинг
Македонскиот скијач Дардан Дехари нема да може да настапи на Зимската олимпијада во Пекинг откако за време на подготовките за своето прво учество на една олимпијада, тој незгодно падна и тешко го повреди десното колено. Дехари требаше да настапи во дисциплините слалом и велеслалом.
- По првите консултации меѓу докторот Лубомир Огњеновиќ, кој е во Пекинг, кинеските доктори и претседателот на Здравствената комисија на МОК, д-р Небојша Настов, станува збор за кинење на предниот вкрстен лигамент на десното колено и Дардан Дехари итно ќе биде опериран - соопштија од Македонскиот олимписки комитет.
Да потсетиме дека Дардан Дехари го носеше македонското знаме на церемонијата на отворањето на ЗОИ што се одржа во петокот и е еден од тројцата македонски претставници во Пекинг, покрај кантри-крос скијачите Ана Цветановска и Ставре Јада.
фото: МОК