Оваа земја штотуку претстави нова програма за „златни пасоши“ вредна 350.000 долари

Аргентина има нов план со кој сака да привлече богати луѓе од целиот свет. Оваа земја неодамна ја претстави својата нова програма за „златни пасоши“, економска иницијатива според која лицата што ќе инвестираат во државата или ќе ѝ донираат пари ќе добијат аргентинско државјанство.

Оваа идеја би можела да биде особено привлечна за странците, имајќи предвид колку е моќен аргентинскиот пасош. Со овој потег Аргентина стана првата земја во Јужна Америка што воведува ваква програма.

Според правилата на програмата, лицето мора да донира 350.000 долари во државната каса на Аргентина или да купи државна обврзница во вредност од 800.000 долари. Доколку подносителот на барањето сака и членовите на неговото семејство да добијат пасоши, трошоците се уште повисоки, со најмалку дополнителни 100.000 долари, се наведува во соопштението со кое беше претставена програмата.

Иако овие износи се прилично високи, инвестицијата би можела да се исплати. Аргентина, имено, се наоѓа на 16. место на ранг-листата на „Хенли енд партнерс“ за најмоќни пасоши за 2026 година. Тоа значи дека сопствениците на аргентински пасош можат да патуваат на 169 дестинации без виза, вклучувајќи ги земјите од Шенген-зоната, Кина, Обединетите Арапски Емирати и Велика Британија. Покрај тоа, аргентинските државјани имаат право да живеат и да работат во други јужноамерикански држави што му припаѓаат на регионалниот блок Меркосур, меѓу кои се Бразил, Чиле и Перу.

Аплицирањето започнува до крајот на годината

- Ова ќе биде уште еден канал преку кој ќе ја претставиме Аргентина пред светот - изјави аргентинскиот министер за економија Луис Капуто на Самитот во Париз, каде што програмата беше и официјално најавена.

Апликациите за новата програма за „златни пасоши“ треба да бидат отворени подоцна оваа година. Иако Аргентина во моментов е единствената земја во Јужна Америка што нуди ваква програма, слични иницијативи постојат и во други делови од светот, особено во многу карипски држави.

Во други земји можат да се најдат и таканаречените „златни визи“, односно програми за стекнување право на престој преку инвестиции. Тие им овозможуваат на странците да живеат и да работат во одредена земја, но не подразбираат автоматско добивање државјанство.

Меѓу државите што нудат вакви програми се Грција, Швајцарија и Нов Зеланд, кој се покажа како особено популарна дестинација за богатите Американци што сакаат да најдат нов дом надвор од својата земја.

Со новата иницијатива Аргентина набрзо би можела да им стане уште една интересна опција.

Извор: BIZlife.rs
Фото: Unsplash