Германија размислува да воведе 12-часовен работен ден: Што би значело тоа?

Германија размислува за можноста за воведување 12-часовен работен ден, а истовремено планира да ја преполови годишната квота за работници од Западен Балкан, иако за големите инфраструктурни проекти ѝ недостигаат дури 148.000 квалификувани работници.

Германската влада разгледува измени на Законот за работното време со кои би им се овозможило на вработените, во одредени случаи, да работат и по 12 часа дневно. За што точно станува збор и каква е моменталната состојба, во емисијата „Нов ден“ на хрватската Х1 објасни новинарот Мехмед Смајиќ од „Дојче веле“.

Смајиќ објасни дека според важечките прописи, работниците вообичаено можат да работат најмногу 8 часа дневно, со можност работното време да се продолжи на 10 часа, под услов дополнителните часови подоцна да се надоместат со пократко работно време.

Во одредени дејности, како што е хемиската индустрија, 12-часовните смени веќе се дозволени.

- Владата сака да овозможи работното време да се пресметува на неделно ниво, а не посебно за секој ден. Тоа значи дека вработените во одредени денови би можеле да работат и по 12 часа, а во другите денови да работат пократко или да имаат повеќе слободни денови - објасни Смајиќ.

Германскиот канцелар Фридрих Мерц го поддржува ваквиот модел, наведувајќи го како пример работното време од 12 часа дневно, но само 3 дена во неделата.

Работодавците сметаат дека ваквата флексибилност би им овозможила полесно да го организираат работењето, особено во периоди кога обемот на работа е зголемен.

Од друга страна, синдикатите предупредуваат на можните последици врз здравјето на вработените и нивниот семеен живот.

Социјалдемократите инсистираат на тоа дека подолгите смени може да се воведат само со јасно утврдени правила, колективни договори и соодветна заштита на работниците.

Смајиќ нагласи и дека подолгиот работен ден не значи автоматски и повисока плата.

- Заработката зависи од договорот и од вкупниот број платени часови. Новите правила би важеле за сите вработени, без оглед на државјанството - истакна тој.

Тој потсети дека и понатаму би морале да важат ограничувањата за неделното работно време, како и задолжителниот одмор меѓу смените.

Сепак, законот сè уште не е изменет бидејќи демохристијаните и социјалдемократите не постигнаа договор.

Извор: Nova.rs
Фото: Magnific