Оваа европска земја повторно е најпопуларна туристичка дестинација во Европа во 2026 година

И покрај значително повисоките цени на авионските билети и скапите угостителски услуги во некои европски градови, интересот за патувања не опаѓа. Напротив, Европа и понатаму е водечка светска туристичка дестинација, покажува најновата анализа на „Амадеус травел интелиџенс“ и Светската туристичка организација на ОН.

Извештајот „Травел инсајтс“, кој го опфаќа периодот од мај 2025 до април 2026 година, покажува дека Европа пречекала дури 130 милиони меѓународни туристи само во првите три месеци од 2026 година. Тоа е зголемување од 4 отсто во споредба со истиот период минатата година.

Шпанија ја задржува водечката позиција

Според извештајот, Шпанија е најпребаруваната и најрезервирана туристичка дестинација во Европа. Заедно со САД и Германија, таа е меѓу трите водечки пазари за патувања во периодот од април до септември.

Земјата се подготвува и за нов туристички рекорд. Шпанскиот министер за туризам неодамна објави дека во текот на 2026 година се очекува да ја посетат околу 100 милиони странски туристи.

За споредба, Шпанија има околу 48 милиони жители, што значи дека бројот на странските посетители би можел да биде речиси двојно поголем од нејзиното население.

Иако Шпанија е на врвот на листата, најбрз раст на туристичките резервации има Чешка. Во споредба со минатата година, резервациите за оваа земја се зголемија за 18 отсто.

На второто место е Исланд со раст од 11 отсто, додека и Данска бележи значително зголемување на интересот.

Овие податоци укажуваат на промена во изборот на туристите. Наместо исклучиво да се насочуваат кон традиционалните дестинации со сонце и плажи, сè повеќе патници избираат градски прошетки и патувања во природа низ Северна и Централна Европа.

Кои туристи најмногу ја посетуваат Европа?

Бројот на јапонски туристи што резервираат патувања во Европа е зголемен за 19 отсто, што е најголем раст меѓу сите анализирани пазари. Значителен интерес за европските дестинации покажуваат и патниците од Данска и Египет.

Интересен е и профилот на туристите што најмногу трошат. Спротивно на претставата дека европските градови се полни главно со млади патници, најголемата потрошувачка доаѓа од луѓето на возраст од 46 до 65 години.

Тие сочинуваат речиси една третина од вкупната побарувачка за патувања во Европа, а нивното учество е особено изразено во популарните градови како Лондон, Париз и Мадрид.

Најмногу резервирани туристички дестинации во Европа

1. Шпанија
2. Италија
3. Франција
4. Обединето Кралство
5. Германија
6. Казахстан
7. Турција
8. Португалија
9. Норвешка
10. Грција

Најпребарувани дестинации во Европа

1. Шпанија
2. Обединетото Кралство
3. Италија
4. Франција
5. Германија
6. Турција
7. Грција
8. Португалија
9. Холандија
10. Полска

Извор: Timeout.com
Фото: Magnific