Само една бременост може да додаде месеци на вашата биолошка возраст

Научниците открија дека растењето човечко суштество во стомакот, односно бременоста, го прави телото на жената „постаро“.

Новото истражување посочува дека една бременост може да додаде од 2 до 14 месеци на вашата биолошка возраст.

- Бременоста си има своја цена, која се чини дека може да се забележи дури и во вашите 20-ти години - вели Кален Рајан, водач на истражувањето и биолог од училиштето за јавно здравје на Универзитетот Колумбија во Њујорк.

Ова значајно истражување го потврдува она што жените веќе го знаат - бременоста зема огромен данок од телото, вели Јусин Су, професор на Универзитетот Колумбија кој истражува како бременоста влијае врз стареењето.

Вашата хронолошка возраст може да се разликува од вашата биолошка возраст, а тоа е колку се стари вашите клетки и органи врз основа на нивната биохемија.

Рајан ги проучува причините зошто нашите тела може да стареат побрзо или побавно отколку што очекуваме, а голем дел од тоа се сведува на епигенетиката или како и кога нашите тела одлучуваат да ги вклучат или исклучат гените.

Одредени животни настани, вклучувајќи поголеми болести, трауми или периоди на интензивен стрес се чини дека предизвикуваат „скок“ во епигенетската возраст бидејќи телото ги пренасочува енергијата и ресурсите кон справување со овие предизвици.

И бидејќи речиси не постојат биолошки функции понапорни од растењето бебе во период од 9 месеци, неодамнешното истражување го потврдува сомнежот на научниците дека бременоста, особено повеќекратната бременост, си го зема својот данок кога станува збор за биолошката возраст.

За да откријат нешто повеќе за овој процес, Рајан и неговите колеги се насочиле кон долгогодишно истражување за меѓугенерациското здравје на Филипините. Во 2005 година тие анализирале примероци од крв од 825 жени на возраст од 20 до 22 години. Научниците идентификувале впечатлива разлика: бројот на епигенетски промени во нивната ДНК открил дека жените што биле бремени биле меѓу 4 и 14 месеци биолошки постари од нивните врснички кои не биле бремени никогаш во животот, дури и откако ги контролирале факторите како што се нивото на приход и навики во пушењето.


Тоа покренало клучно прашање: Дали повеќекратната бременост создава кумулативен ефект на стареењето, при што секоја дополнителна бременост дополнително ја зголемува епигенетската возраст на мајката?

Со споредување на епигенетската возраст на секоја жена, Рајан и неговиот тим го пресметале влијанието на секоја дополнителна бременост.

- Жените што имале повеќе бремености имале повеќе промени во епигенетското стареење - вели Рајан.

Су вели дека наодите на Рајан претставуваат важен напредок во разбирањето за тоа како повеќекратната бременост влијае врз биолошката возраст, бидејќи најголемиот дел од постојните истражувања испитувале само една бременост.

Новото истражување, вели Су, се коси со она што го знаеме за високата стапка на раѓање деца: дека доживувањето многу бремености може да доведе до пократок животен век и поголем ризик од кардиоваскуларни болести.

Причина за оптимизам

Но, идните родители не треба да очајуваат, велат Су и Рајан - не е сигурно дека малку повисоката епигенетска возраст предизвикана од бременоста ќе доведе до компликации по неколку децении.

Всушност, некои истражувања сугерираат дека може да постои „слатка точка“ за плодноста, вели Су. На пример, една или две бремености може да бидат подобри од ниедна во некои случаи, бидејќи бременоста е поврзана со помали ризици од одредени видови рак, а раѓањето барем едно дете е поврзано со малку подолг животен век.

Неодамнешните студии покажуваат дека епигенетската цена на бременоста може да се разликува по земја и култура, што сугерира дека родителската поддршка и пристапот до здравствена заштита може да играат значајна улога, така што подобрувањето на овие работи може да го ублажи ударот на бременоста врз епигенетската возраст.

Су додава дека ќе бидат потребни повеќе истражувања за да се открие влијанието на породувањето врз епигенетската возраст, како и да се испита дали товарот на бременоста е поголем кога родителите се постари од оние во истражувањето.

Извор: National Geograhic
Фото: Freepik