Завршува ерата на бесплатно користење на туѓи кориснички сметки

Ерата на бесплатно користење на туѓи кориснички сметки преку споделување лозинки на стриминг-платформите е речиси завршена. Новите мерки против ваквата пракса веќе даваат резултати во САД.

Компанијата „Дизни“ ги надмина очекувањата со тоа што во првиот квартал од 2025 година доби 2,5 милиони нови претплатници на „Дизни+“ и „Хулу“. Аналитичарите предвидуваа пад, со оглед на забавениот раст на индустријата, но извршниот директор Боб Ајгер го припишува успехот на политиката на „платено споделување“, која беше воведена минатата есен за „Дизни+“, а во март 2024 година и за „Хулу“. Корисниците сега можат да платат дополнителни 6,50 до 9,30 евра месечно за да дозволат пристап на лица надвор од нивното домаќинство.

„Нетфликс“ прв го воведе овој пристап и, покрај негодувањата од корисниците, постигна рекорден раст на бројот на претплатници. „Ворнер Брос. Дискавери“ воведе платено споделување на „Макс“ кон крајот на април оваа година, иако мерката сѐ уште не ги опфаќа сите корисници. Компанијата „Ен-би-си јуниверсал“ ги ажурираше условите за користење на „Пикок“ и забрани споделување сметки, што укажува на тоа дека истите мерки наскоро ќе почнат да се применуваат и таму.

Некои уште ја одложуваат промената

„Парамаунт“, „Амазон“ и „Епл“ засега не воведуваат ограничувања, но тоа би можело да се промени, бидејќи и нивните услуги технички се наменети за едно домаќинство.

Иако многумина ќе бидат приморани да почнат да плаќаат, повеќето големи стриминг-платформи сега нудат поевтини претплати со реклами, кои стануваат сѐ популарни, дури и меѓу оние што претходно не сакаа да плаќаат.

Извор: Zimo.dnevnik.hr
Фото: Freepik