Уредник на податоците на „Гугл“ открива: „Ова прашање најмногу го поставуваме кога никој не нѐ гледа“

Сајмон Роџерс, уредник на податоците на „Гугл“, открива што најмногу пребаруваме на интернет.

Oгромен дел од времето го трошиме на социјалните мрежи обидувајќи се да се прикажеме во најдобро светло, додека многу поретко го користиме интернетот за навистина подлабоко да го разбереме светот околу нас или, како што тој духовито забележува, барем да признаеме дека воопшто не знаеме што правиме.

- Како уредник на податоците на „Гугл“, моите денови ги поминувам гледајќи во најголемиот јавно достапен збир на податоци во светот. За мене тоа е „мозокот на светот“, претставен преку податоци. Тој нуди единствен увид во тоа за што размислуваат луѓето во последните две децении - вели Роџерс.

Тие податоци се непогрешливо искрени. Начинот на кој пребаруваме, колективно, едноставно не е ист како начинот на кој се претставуваме на социјалните мрежи. Не постои глупаво прашање, а анализирањето на овие масивни трендови дава многу точен одраз на нашата заедничка љубопитност.

Кога анализираме милијарда прашања што се поставуваат секоја година, се појавуваат неверојатни обрасци. Еве три прашања што луѓето ги поставуваат и изненадувачките увиди што тие ги откриваат за тоа кои навистина сме.

1. „Како да се свари јајце?“

Ако ги погледнете најчестите прашања на сите времиња, низ целиот свет, можеби би очекувале сложени метафизички прашања. Иако прашањето „Што е љубов?“ е меѓу првите 10, на листата во огромна мера доминираат секојдневни прашања.

„Како да се свари јајце“ постојано е едно од најпребаруваните „Како…“ прашања поврзани со храна ширум светот. Често пребаруваме и работи како „Како да се поправи ве-це школка“ или „Како да се поправи врата“.

Лесно е да се заклучи дека ги губиме основните животни вештини, дека понекогаш забораваме како се прават едноставни „возрасни“ задачи.

Но во овие податоци се крие една многу оптимистична човечка особина. Пребарувањето ни дава средина без осуда, во која можеме да признаеме што не знаеме. Фактот дека милиони луѓе пишуваат вакви основни прашања значи дека, дури и кога сме изгубени, активно сме подготвени да учиме и да се подобруваме.

2. „Кои работни места им помагаат на луѓето?“

Начинот на кој ја гледаме кариерата драматично се промени во последните години, а податоците од „Гугл трендс“ тоа јасно го потврдуваат. Сè почесто бараме совети за професионални предизвици и тивко прашуваме: „Како да побарам покачување?“, „Како да побарам повратна информација?“ или „Како да побарам препорака?“.

Со години, еден од најчестите пребарувани изрази поврзани со кариера беше „добро платени работни места“.

Пребарувањата „работни места што им помагаат на луѓето“ всушност ги надминаа пребарувањата „добро платена работа“. Најбарани улоги во оваа категорија се терапевти, социјални работници и психолози.

Колку и да се грижиме за финансиската иднина, нашите заеднички прашања покажуваат заедничка желба да придонесеме за општеството.

3. „Како да помогнам...“

Често слушаме дека интернетот ги истакнува нашите најсебични, најподелени или најлути импулси. Но податоците од пребарувањата силно ја побиваат идејата дека луѓето се заинтересирани само за себе.

Пребарувањата „Како да помогнам...“ никогаш не биле почести од сега. И во САД и во Обединетото Кралство, најпребаруваното прашање во оваа категорија во последните десет години е „Како да му помогнам на некој со депресија“, а веднаш зад него се анксиозноста и паничните напади.

Тоа е потсетник дека пребарувањето е само почетна точка, а стручната помош може да биде клучна кога некој се соочува со проблеми.

Кога гледаме дека некој се мачи, нашиот прв заеднички инстинкт е да помогнеме, само не секогаш знаеме од каде да почнеме. Без разлика дали станува збор за глобална криза или пријател што поминува низ тежок период, се насочуваме кон интернетот за совети како да бидеме тука за другите.

- Важно е да знаете дека не сте единствената личност што пребарува како се вари јајце, како да побарате покачување или како да утеши некој близок што тагува. Ние сме луѓе. Не сме совршени, но имаме многу повеќе заедничко отколку што мислиме - вели Сајмон Роџерс.

Извор: Mondo.rs
Фото: Screenshot