Најголемата промена во изминативе десет години: Еве како ќе изгледа новиот „Нетфликс“
Подготвил:
Тамара Гроздановски
Лектор:
Ивана Кузманоска
Дали сте задоволни со моменталниот изглед на апликацијата „Нетфликс“ на телевизор? Иако со текот на годините се навикнавме на изгледот на „Нетфликс“, сепак тој е прилично хаотичен.
Тоа им е јасно и на луѓето од „Нетфликс“, па најавија дека ќе почнат да прават големи промени во нивната апликација за телевизори, најавувајќи ја најголемата промена во последната деценија. Како што коментира Пет Флеминг, еден од директорите на „Нетфликс“, нивното внатрешно истражување покажало дека корисниците на апликацијата „Нетфликс“ на телевизорите често користеле, како што тој ја нарекува, гимнастика за очи. Нивните очи постојано кружеле околу различни делови од екранот обидувајќи се да најдат содржина што може да им биде интересна.
- Сакавме да поедноставиме сè, да ја направиме поинтуитивна и полесна за навигација - објаснува Флеминг, па во иднина претплатниците на „Нетфликс“, кои се околу 270 милиони, би требало многу побрзо и полесно да најдат атрактивна содржина. Оваа недела компанијата започна со тестирање на новиот изглед кај некои корисници, а со текот на времето новиот интерфејс треба да стане достапен за поголем број луѓе. Ќе се следат и реакциите, критиките и пофалбите за новиот дизајн.
Како изгледа новиот „Нетфликс“, можете да видите на веб-страницата на „
Ројтерс“, а овие промени не се радикални. Веќе нема странично мени на главната страница, а главните опции се преместени на самиот врв на екранот. Има опции Home, Shows, Movies и новиот таб My Netflix (овој таб претходно беше претставен на мобилни уреди) каде што се достапни филмови и серии кои корисникот почнал да ги гледа порано и оние што ги означил како интересни.
Иконите за содржината се зголемени, а информациите прикажани заедно со содржината се реорганизирани, а истакнати се и некои ситници и интересни факти за филмовите и сериите, па може да се нагласи дали филмот е меѓу првите 10 најгледани филмови два месеци и слично. Она што нема да се промени со новиот интерфејс е алгоритамот, односно препораките за корисниците, кои остануваат исти како и досега.
Извор:
Zimo.dnevnik.hr
Фото: Freepik