Компанијата „Сони“ ги враќа култните слушалки од времето на првиот вокмен, со препознатливиот дизајн
„Сони“ враќа едни од своите препознатливи слушалки од минатото, но во модернизирано издание. Станува збор за слушалките што првпат беа претставени заедно со легендарниот вокмен во 1979 година и придонесоа слушањето музика во движење да стане популарно. Новиот модел го задржува препознатливиот изглед, но има и практични измени приспособени на современите уреди.
Новите МДР-3Р се омаж на оригиналните слушалки МДР-3, а една од најважните новини е приклучокот УСБ-Ц. „Сони“ ги задржа карактеристичните детали од стариот дизајн, но со додавањето микрофон и копчиња за контрола на кабелот овозможи слушалките да се користат и за секојдневните потреби на денешните корисници.
Ретродизајн со современи додатоци
Слушалките МДР-3Р речиси целосно го задржуваат изгледот на оригиналниот модел, вклучувајќи ги лесната конструкција и отворениот дизајн, кој не ги покрива целосно ушите. Препознатливите сини и портокалови перничиња се дел од новото издание, а корисниците можат да ги менуваат според сопствените желби. Дури и пакувањето и упатството за употреба се осмислени така што потсетуваат на оригиналниот производ.
„Сони“ ги задржа и звучниците со пречник од 23 милиметри, какви што имаше и првичниот модел. Според компанијата, звукот е приспособен така што го задржува карактеристичниот звук на оригиналот, со мали измени за да одговара на современите навики при слушањето музика. Слушалките имаат и вграден микрофон за телефонски разговори, како и копчиња за контрола на кабелот. Благодарение на поврзувањето преку УСБ-Ц, нема потреба од полнење, безжично поврзување или инсталирање ажурирања.
Извор:
24sedam.rs
Фото:
Sony/X