Технолошки компании на тркалезна маса со рабини, свештеници и имами поради етиката на ВИ

Претставници на „Антропик“ и „Опен АИ“ минатата недела седнаа на маса со рабини, свештеници и имами за да разговараат за етиката на вештачката интелигенција

Собирот „Фејт-ВИ ковенант“ го организира женевската „Интерфејт алијанса за побезбедни заедници“, која е посветена на борбата против екстремизмот, радикализацијата и трговијата со луѓе. Сега таа се занимава и со технолошката етика.

Поводот е едноставен - технолошките компании, соочени со прашања кои нивните етичари, правници и ПР-оддели не можат да ги решат на задоволителен начин, сега го бараат одговорот од институциите кои со децении ги игнорираа. Силициумската долина, која главно ја третираше религијата како пречка за рационализмот и ефикасноста, сега ги повикува божјите претставници на консултации. Тркалезната маса е замислена како прва во низата глобални собири, а следните ќе се одржат во Пекинг, Најроби и Абу Даби. Откако ќе заврши обиколката, компаниите ќе го имаат она што го нарекуваат „етичка рамка“. Што точно таа рамка ќе смени во развојот на моделите, нема да му биде познато никому, па ниту на божјите слуги.

ВИ - исклучителен плод на човечката креативност

Верските институции не ја чекаа поканата од ВИ индустријата за да заземат став. Ватикан во јануари 2025 година објави документ под наслов Antiqua et Nova, триесетина страници теологија и предупредувања, кој ја дефинира ВИ како „исклучителен плод на човечката креативност“ кој сепак нема „морална совест, ниту автентична слобода“. Папата Лав IV им порача на свештениците да не ги пишуваат проповедите со помош на ВИ алатки. Мормонската црква ја вклучи ВИ во прирачникот: „ВИ не може да го замени дарот на божествената инспирација“. Сето тоа се легитимни изјави и барања, но истовремено немаат големо влијание врз тоа што „Антропик“ или „Опен АИ“ и другите утре ќе пуштат во продукција.

Различно видување на собирот

Рабинката Дајана Герсон, која учествуваше на тркалезната маса, рече дека верските заедници различно ги гледаат приоритетите. Ако религиите не можат да ги усогласат вредностите, прашање е што ќе се добие од разговорите бидејќи ниту компаниите немаат заедничка основа.

Дилан Бејкер од „Дистрибутед АИ рисирч институт“, непрофитна истражувачка организација која го критикува брзиот развој на ВИ, го постави прашањето кое не беше поставено на тркалезната маса: Дали воопшто треба да се градат овие нешта или само расправаме за тоа како да не се згреши при градбата на нешто чие градење не се преиспитува. Според сè што е објавено, тоа не беше на дневниот ред. Компаниите доаѓаат со претпоставка дека развојот на вештачката интелигенција е неопходен и незапирлив, и дека единственото отворено прашање е како да се конфигурираат постојните проекти и какви вредности да се вградат во нив. Религиските институции, засега, не се противат на изградбата на ВИ системите.

Џоана Шилдс, поранешна директорка во „Гугл“ и „Фејсбук“, ја образложи причината за собирот: Регулацијата не може да го следи темпото на развојот, но верските водачи со милијарди следбеници имаат „искуство во чувањето на моралната безбедност на луѓето“ и треба да имаат глас.

Руман Чодури, извршна директорка на непрофитната „Хјумејн интелиџенс“, понуди поинакво видување.

- Силициумската долина со години веруваше дека може да влијае врз универзални етички начела, но брзо сфати дека не може, па сега посегнува по религијата како начин на управување со она што не знае да го дефинира. Во најдобар случај, тоа е дефокусирање - рече таа.