Успехот зависи од парите, а не од знаењето?!

Едно од најчесто поставуваните прашања денес се однесува на успехот во животот, но и од што зависи тој. Дали и колку е важно од каде потекнуваме или, пак, знаењето е пресудно?

Сè повеќе се чини дека потеклото и понатаму е поважно од образованието.

Социологот Џон Голдторп од „Оксфорд“ спровел истражување наречено „Social Class Mobility in Modern Britain: Changing Structure, Constant Process“, кое покажало дека вложувањето во образованието на национална основа има мало влијание врз социјалната мобилност, бидејќи богатите семејства користат економски, културен и социјален капитал за да обезбедат децата да им бидат пред другите.

Голдторп тврди дека помладите генерации имаат поголеми шанси да пропаднат во поглед на социјалната мобилност отколку да се искачат.


Образованието е важно, но очигледно не е доволно за да се „израмни“ играта, односно да се издигнат луѓето што доаѓаат од посиромашни семејства - се согласува докторката Ванда Випорска од организацијата „Фондот за еднаквост“.

- Во многу професии оние што оделе во приватни училишта добиваат значително повисока плата од оние што оделе во државни училишта, дури и ако дипломираат на ист факултет - вели Випорска.

Со оглед на тоа што истражувањето е спроведено на ниво на Велика Британија, опишан е примерот за запишување на врвни универзитети во Велика Британија.

Уписот на вакви универзитети сè уште е селективен, и покрај тоа што повеќе од кога било постојат студенти кои имаат предуслови да се запишат на вакви места. На овие универзитети на располагање се малку места, а тие места генерално се резервирани за богатите деца што доаѓаат од приватните училишта.