Се продава село во Тоскана - оддалечено само 40 минути од националниот парк Чинкве Тере

Повеќе од 5.000 квадратни метри станбен простор, земјиште што се простира на 18,8 хектари, идиличен пејзаж и апсолутен мир и напуштени камени куќички што чекаат некој да им „вдахне“ љубов (и многу пари) за да ги обнови. Сето ова моментално е на продажба: буквално цело село во граничниот дел на Тоскана, познат како Луниџана. Овој мал рај, кој бара сериозна инвестиција, е ставен на пазарот по цена од еден милион евра.

Според податоците на агенцијата „АЗ Италијан пропертис“, селото се наоѓа на околу 40 минути возење од брегот на Апуанските Алпи, Версилија и познатиот национален парк Чинкве Тере. Најблискиот аеродром е во Пиза, оддалечен околу 90 километри.



Агенцијата гледа голем потенцијал во ова место, предлагајќи можности за изградба на хотели, ресторани, спа-одморалишта и рурален туризам.

- Целото село треба да се обнови. Во него нема жители, нема станбени куќи, туку само неколку штали што сопствениците сè уште ги користат како простор за складирање. Селото е напуштено пред околу 30 години. Може да се обноват повеќе од 5.000 квадратни метри градби, а продажбата вклучува и 18,9 хектари земјиште - стои во инстаграм-објавата на агенцијата.

Луниџана – место каде што се спојуваат различни културни влијанија

Луниџана отсекогаш била позната како граничен регион во кој се судираат различни влијанија. Регионот се наоѓа помеѓу Тоскана и Лигурија и по своите карактеристики не припаѓа целосно ниту на една од овие области. Ова е крај богат со историја што се протега сè до времето на Етрурците, задржувајќи ја својата автентичност и духот на старите времиња.

Доколку се најде сериозен инвеститор со доволно средства за реставрација, нема сомнение дека ова напуштено село во иднина би можело да стане вистински туристички хит.



Извор: Putnikofer.hr
Фото: Az Italian Properties/Screenshot/YouTube