Имате 500.000 евра вишок? Можете да купите дел од Ајфеловата кула

Заборавете на магнетите за фрижидер и маиците со натпис „Париз“. За оние со длабок џеб и вишок простор во дневната соба, на 21 мај се отвора можност што не се пропушта - аукција на оригинален дел од Ајфеловата кула.

Станува збор за автентичен сегмент од спиралните скали кои некогаш ги поврзувале вториот и третиот кат на кулата, токму оној дел што водел до приватната канцеларија на Густав Ајфел.

Зошто скалите завршиле на аукција?

Кога кулата била градена за Светската изложба во 1889 година, лифтовите биле иднина, а скалите сурова реалност. Дури во 1983 година, поради модернизација и вградување нови лифтови, познатите спирални скали биле отстранети. Тие биле исечени на 24 дела: неколку завршиле во музеи, еден останал на првиот кат од кулата, додека преостанатите биле продадени на аукции и расеани низ светот, од Дизниленд до приватни колекции во Јапонија.

Сега, еден анонимен сопственик, кој својот дел од 2,6 метри го чувал 40 години, одлучил да го продаде.



Аукциската куќа „Арткиријал“ проценува дека овој примерок ќе достигне цена од најмалку 50.000 евра, но историјата нè учи дека колекционерите не прашуваат за цената кога станува збор за симболот на Франција.

На пример, во 2013 година сегмент со 19 скалила бил продаден за над 212.000 евра. Рекордот бил постигнат во 2016 година, кога сличен дел од кулата бил продаден за неверојатни 523.800 евра.

Ваквите аукции ја покажуваат стабилноста на пазарот на историски предмети. За инвеститорите, ова не е само куп железо од 19 век, туку средство чија вредност расте со секоја деценија. Да се поседува дел од најпосетената светска атракција е прашање на престиж што ги надминува класичните инвестиции во уметнички дела или недвижности.

Доколку имате половина милион евра и таван повисок од три метри, забележете го 21 мај во вашиот календар.

Извор: BIZlife.rs
Фото: Freepik