На градилиште во Швајцарија откриен предмет стар 2.000 години - никој не знае како се нашол таму
На едно градилиште во Швајцарија археолозите нашле предмет кој на прв поглед се чинел небитен. Меѓу камењата и земјата се наоѓало парче за кое првично верувале дека е обичен камен, но со подетална анализа било откриено дека станува збор за исклучително редок и фасцинантен археолошки наод - леб од римскиот период стар речиси две илјади години. Лебот бил откриен на околу 32 километри североисточно од Цирих при подготвителни работи за изградба на станбен комплекс.
Експертите веруваат дека станува збор за римска погача
Како што соопшти Кантоналниот оддел за образование во Аргау, пронајдениот предмет е широк околу 10 сантиметри и дебел приближно три сантиметри. Според досегашните процени на експертите, најверојатно станува збор за римска погача или вид тенок леб каков што се користел во тоа време.
Лебот преживеал благодарение на јагленизацијата
Експертите објаснуваат дека лебот опстанал благодарение на процесот на карбонизација, односно јагленизација. Тој процес настанува кога органска материја ќе биде изложена на многу високи температури во специфични услови, најчесто при пожар или слични инциденти.
Се претпоставува дека некоја несреќа овозможила лебот да се зачува речиси 2.000 години.
Сепак, прашањето како точно оваа римска погача ги преживеала вековите и понатаму нема конечен одговор. Во моментов се спроведуваат лабораториски анализи кои би требало попрецизно да ги објаснат условите поради кои дошло до нејзиното зачувување.
Откритието би можело да го промени знаењето за римското присуство во тоа подрачје
Важноста на откритието дополнително се зголемува поради фактот дека локалитетот се наоѓа во близина на античката римска населба Виндониса, која некогаш била едно од поважните воени упоришта на северната граница на Римското Царство. Тоа подрачје првично служело како воен логор на римските легии, а подоцна се развило во населено место.
Научниците со години се обидуваат да утврдат кога тоа подрачје престанало да биде привремена воена база и станало трајна населба на римските сили.
Ретка трага од секојдневието на старите Римјани
Археолозите истакнуваат дека ваквите откритија се исклучително ретки и драгоцени бидејќи нудат многу повеќе од обични технички податоци за римскиот период. За разлика од оружје, ѕидини или керамика, сочуваното парче храна овозможува опиплив увид во секојдневниот живот на луѓето што живееле пред речиси две илјади години. Токму затоа експертите веруваат дека ова би можело да стане едно од поинтересните археолошки откритија во последните години во Швајцарија.
Фото: принтскрин/инстаграм