Поштар 33 години собирал камења и изградил палата која денес го воодушевува светот
Приказната за Фердинанд Шевал докажува дека упорноста може да ги надмине и најголемите пречки. Овој скромен француски поштар повеќе од три децении собирал камења на своите секојдневни маршрути, а резултатот од неговата работа денес зачудува милиони луѓе.
Сè започнало во далечната 1879 година, кога францускиот поштар Фердинанд Шевал при доставувањето пошта се сопнал од необично обликуван камен. Наместо да го фрли, го понел со себе. Тој случаен момент му го променил животот и станал почеток на еден од најнеобичните архитектонски потфати во историјата.
Собирал камења на поштарската маршрута
Шевал секојдневно поминувал околу 30 километри доставувајќи пошта по селата во Југоисточна Франција. На почетокот интересните камења ги носел во џебовите, потоа во кошница, а подоцна и во градежна количка. По завршувањето на работниот ден, тој поминувал часови и ноќи градејќи ја својата визија, притоа користејќи само камења, вар и цемент. Никогаш не студирал архитектура ниту градежништво. Сè што знаел научил самостојно, со методот на обиди и грешки.
Палата каква што светот нема видено
Инспирацијата ја наоѓал на разгледниците и илустрациите што ги разнесувал како поштар. Така настанала „Идеалната палата“, градба во која се спојуваат елементи на хиндуистички храмови, средновековни замоци, арапски џамии и алпски куќи. Фасадата е украсена со скулптури на егзотични животни, митолошки суштества и многу натписи кои ги слават трудот, упорноста и човечката имагинација.
Работел цели 33 години
Изградбата траела од 1879 до 1912 година. За завршување на палатата му биле потребни повеќе од 10.000 денови, односно околу 93.000 часови работа. Иако многу мештани го сметале за чудак и го исмевале поради собирањето камења, Шевал не се откажувал од својот сон. По завршувањето на палатата, тој посакал таа да биде неговото последно почивалиште. Но бидејќи француските закони не го дозволувале тоа, на 74-годишна возраст ја започнал изградбата на сопствениот мавзолеј на локалните гробишта, на кој му ги посветил последните осум години од својот живот.
По неговата смрт во 1924 година, бил погребан токму таму.
Светски признаено ремек-дело
Вредноста на неговиот труд ја препознале многу уметници, меѓу кои биле Пабло Пикасо и Андре Бретон. Денес, „Идеалната палата“ е заштитена како француски културен споменик и претставува една од најпознатите туристички атракции во Франција. Секоја година стотици илјади посетители доаѓаат за да ја видат неверојатната палата што со сопствени раце ја изградил еден обичен поштар – доказ дека големите соништа понекогаш започнуваат сосема случајно, со еден обичен камен на патот.
Фото: принтскрин/јутјуб