Симулација на дипломатски прием во „Јахја Кемал“ во Струга

Симулација на дипломатски прием по седми пат беше организирана изминатиот викенд во просториите на училиштето „Јахја Кемал“ во Струга. Учествуваа ученици од четврта година и професори, како и јавни личности од Струга. На учениците матуранти пред настанот им претходеше обука и практична настава за тоа како да се однесуваат на сите типови формални настани и кои се протоколите. Настанот го збогати и школскиот бенд, кој свиреше џез-музика.


Идејата за овој настан начелно ја даде одделот на општествените студии во училиштето, уште пред седум години, и во соработка со градот Струга ја реализира со голем успех. Учениците ги дочекува домаќинот на приемот, кој обично е професор од редовите на општествените науки. Сите учесници следат одреден кодекс на облекување карактеристичен за тој вид формален прием.


Според управата на училиштето, ова е важен настан бидејќи голем број од учениците од „Јахја Кемал“, според статистиката, го продолжуваат своето образование надвор од државата и се многу успешни јавни личности од областа на бизнис-заедницата, како и од научната елита во земјата и во странство.