Промената на една мисла може веднаш да го намали стресот за работата
„Ме очекува супер стресна недела“, „Мојата работа е навистина стресна“. Вакви мисли и реченици предизвикуваат лошо спиење, раздразливост и нетрпение, постојана грижа за обврските...
Дали верувате дека вашата работа е многу стресна? Добро. Тоа значи дека има нешто што можете да го направите веднаш за да ја направите помалку стресна. Престанете да си кажувате дека вашата работа е многу стресна.
Проблемот со дефинирањето на вашата работа како стресна
Нашиот нервен систем не прави добра разлика помеѓу реалните закани и очекуваните. Со тоа што ја опишувате вашата работа (или вашата недела) како „многу стресна“, испраќате сигнал до вашиот мозок да го предвидува стресот цел ден, секој ден. Вашето тело ќе реагира на тој сигнал со ослободување хормони на стрес како опасноста да е навистина присутна цело време, држејќи ве во постојана состојба „борба или бегство“ цел ден, секој ден, и ставајќи ве во ризик од исцрпување, односно „прегорување“.
-Стресниот состанок прераснува во „денес ќе биде ужасно“.
-Менаџерот што бара многу прераснува во „мојот шеф е неподнослив“.
-Тешката и напорна недела прераснува во „оваа работа ме уништува“.
Тоа постојано активирање е причината што сте исцрпени во релативно добри денови, што ќе им се налутите на колегите или најблиските без јасна причина, што ќе се мачите да се „исклучите“ навечер и ризикувате прегорување - вашето тело никогаш не ја добива пораката дека е безбедно да се повлечете. Нашиот физиолошки одговор на стрес треба да ни помогне да се активираме и да закрепнеме - да се подготвиме кога е потребно и да се опуштиме кога заканата ќе помине. Кога ја етикетирате целата ваша работа како стресна, си го негирате тоа закрепнување.
Поздрав и попрецизен начин да размислувате за работата
Да бидеме реални. Вашата работа не е немилосрдно стресна - ниедна работа не е. Има многу стресни моменти, но има и помалку стресни. За да го намалите работниот стрес што го чувствувате, не треба да ги минимизирате вистинските притисоци или да се преправате дека вашата работа е лесна - само треба да бидете попрецизни. Наместо да кажете: „Мојата работа е исклучително стресна“, кажете: „Имам неколку тешки состаноци, но денес има и некои полесни.“ Наместо да кажете: „Мојот шеф е неподнослив“, може да кажете: „Не ми се допаѓа мојот шеф, но денес го гледам само неколку часа.“
Оваа суптилна промена прави две моќни работи:
1. Му кажува на вашиот мозок дека стресот е привремен и ограничен, а не постојан.
2. Ве потсетува дека не секој час заслужува ист емоционален интензитет.
Стресот на работа не се однесува на тоа што се случува на работа, туку на тоа како го обликуваме и перципираме она што се случува. Кога го опишувате вашиот работен ден со повеќе нијанси, престанувате да ги контаминирате мирните моменти со непотребна тензија. Дозволувате паузите да ги чувствувате токму како паузи. Заштедувате енергија наместо да ја согорувате целата во исчекување. Оваа едноставна промена ќе ја намали емоционалната исцрпеност, ќе го подобри фокусот и ќе ви го олесни отпуштањето по работното време, бидејќи вашиот мозок конечно ќе престане да го третира секој момент како итен случај.
Извор: psychologytoday.com
Фото: Freepik