Како ќе се означува музиката создадена со помош на ВИ?

Неколку водечки професионални организации во музичката индустрија претставија ознаки за содржини создадени со помош на ВИ, надевајќи се на нивно широко прифаќање, особено од страна на стриминг-платформите.

Иницијативата ја предводат Меѓународната федерација на фонографската индустрија и американското здружение РИАА, а им се придружија и организациите што стојат зад наградите „Греми“ и неколку независни музички здруженија.

Индустријата предлага две ознаки.

Првата е „генерирано со вештачка интелигенција“, а ќе се однесува на музиката и песните во кои е користена ВИ за создавање на сите или на повеќето креативни елементи. Тоа ја вклучува музиката што е целосно настаната врз основа на текстуални упатства, како и песните во кои главната вокална изведба или значаен инструментален дел е произведен од ВИ.

Втората ознака, „со помош на вештачка интелигенција“, е наменета за песни со значаен човечки придонес во создавањето, но во кои ВИ е користена за одредени елементи. Важен критериум за оваа ознака е главните инструментални делови и сите вокални делови да бидат изведени од луѓе.

Организациите што стојат зад овој класификациски систем порачуваат дека ќе работат на неговата примена со стриминг-сервисите, дистрибутерите и регулаторните тела.

Исто така, наведуваат дека до денес само „Дизер“, меѓу главните музички платформи, систематски ги означува песните генерирани со вештачка интелигенција. „Спотифај“ кон крајот на април ја лансира ознаката „Верифицирано од Спотифај“, која се доделува врз основа на неколку критериуми и сугерира дека изведувачот или групата е најверојатно човек, а не ВИ.

Извор: 021.rs
Фото: Magnific