Новини за стимулација за студирање на Технолошко-техничкиот факултет - Велес: ослободување од партиципација за одредена студиска програма

Технолошко-техничкиот факултет (ТТФ) од Велес како високообразовна институција при Универзитетот „Св. Климент Охридски“-Битола во континуитет обезбедува образование на високостручни кадри преку современи студиски програми на трите циклуси академски студии кои овозможуваат стекнување знаења, вештини и искуства од областа на нутриционизмот, прехранбената технологија и биотехнологијата.

Во рамките на една присутна и изразена свесност за значењето на секоја поддршка што им се нуди на студентите, Факултетот нуди можност  во следните уписни рокови да го стимулира и финансиски да го помогне студирањето на насоката ПРЕХРАНБЕНА ТЕХНОЛОГИЈА И БИОТЕХНОЛОГИЈА.

Имено, во рамките на реализацијата на Конкурсот за упис на нови студенти во прва година, во рамки на вториот и третиот уписен рок, Технолошко-техничкиот факултет, сите нови студенти што ќе се запишат како редовни студенти на студиската програма Прехранбена технологија и биотехнологија во учебната 2021/2022 ги ослободува од партиципација во првата академска година (во денарска противвредност  од 200 ЕУР).

Од оваа единица на УКЛО потврдуваат дека паралелно со поддршката за своите студенти, посветени се на обезбедување квалитет на наставниот и научноистражувачкиот процес. Факултетот посветува особено внимание и на практичната настава, преку која студентите стекнуваат адекватни искуства и знаења неопходни за нивниот професионален развој. За таа цел, Факултетот соработува со голем број стопански субјекти каде што се реализира практичната настава на студентите, предвидена со студиските програми и на тој начин се овозможува, набргу по дипломирањето, академското столче да го заменат со конкретна работна позиција.

За значењето на студиските програми на Технолошко-техничкиот факултет, а особено за перспективите што им се нудат на студентите, повеќе од впечатливо говорат фактите произлезени од „новото реално време“ обележано со ковид-кризата: евидентното зголемување на побарувачка на храна, особено онаа што го поддржува имунолошкиот систем. Современиот потрошувач преферира храна со висок квалитет и нутритивна вредност, а ваквите барања наметнуваат потреба од примена како на традиционални така и иновативни технологии и рецептури во преработката на храната. Секако, тоа наметнува и потреба од едуциран кадар што ќе биде подготвен да се вклучи во процесите на производство на безбедна и здрава храна во согласност со современите потреби.