„Светот на Биби“ го отвори Brave New Media Forum во Белград

Проектот „Светот на Биби“ ја имаше честа да го отвори Brave New Media Forum 2019, кој денеска и утре се одржува во Белград. По покана на „Дојче веле академија“, која е организатор на настанот, српската и публиката од регионот дознаа повеќе за нашиот проект. Ексклузивно беше прикажан тизер од првата епизода што ќе ја емитуваме на српски јазик „Биби и џиновите“, која на 1 декември во 19 часот ќе биде прикажана на јутјуб-каналот „Бибин свет“.

За проектот зборуваше Марјан Алексовски, еден од продуцентите на „Светот на Биби“. Тој ги најави и првите чекори на тимот за пробивање на српскиот пазар.

- Кога почнавме, се сеќавам лани кога бевме тука на истиот настан, дека за еден месец имавме 60.000 прегледи, а сега веќе имаме 8 милиони. 96 отсто од тие прегледи се во Македонија, што значи дека Биби ја прифатија и децата и родителите. Тој феномен ни дава мотивација да ја развиваме оваа анимација. Веќе имаме и Едукативен центар, образовен програма, која сега е пилот-проект и децата учат заедно со ликовите од овие анимации - вели Алексовски.

Целта на Brave New Media Forum 2019 е да спојува медиумски стручњаци, активисти и претставници на цивилното општество со младите.

- Претставуваме инспиративни примери на најдобрите практики од традиционалните и „младите медиуми“ од Западен Балкан, како и другите земји од Западна и Источна Европа - стои во објаснувањето на настанот.