70 проценти од пациентите со рак преживуваат најмалку пет години

Американското здружение за рак го објави својот годишен извештај за статистиката за случаите на рак во САД и понуди ретко добра вест - процентот на луѓе што биле живи најмалку пет години по дијагнозата на рак достигнал рекордно високо ниво.

Извештајот покажал дека меѓу сите пациенти со рак дијагностицирани помеѓу 2015 и 2021 година во САД, стапката на преживување од петгодишната граница во однос на оние што немале рак била 70 проценти. Ова е највисоката стапка досега забележана од здружението. Истражувачите ги припишуваат придобивките на подоброто откривање и лекување, како и на намалувањето на пушењето.

- Седум од 10 луѓе сега го преживуваат ракот пет години или повеќе, во споредба со само половина од случаите во средината на 70-тите години. Оваа зачудувачка победа е во голема мера резултат на децении истражувања за ракот, кои им обезбедија на здравствените работници алатки за поефикасно лекување на болеста, претворајќи многу видови рак од смртна казна во хронична болест - изјавила Ребека Сигел, виш научен директор во здружението.

Се забележуваат најголеми подобрувања во однос на преживувањето кај некои од најсмртоносните видови рак. На пример, петгодишната релативна стапка на преживување кај миеломот (вид рак што влијае на коскената срцевина) речиси се дуплирала помеѓу 90-тите и сега, скокајќи од 32 на 62 проценти, додека преживувањето од рак на црниот дроб се зголемило повеќе од трипати - од 7 на 22 проценти.

- Делумно тоа се должи на поголемото разбирање на геномот на ракот и развојот на целни терапии против мутации на ракот. Луѓето живеат со метастатски рак со години и години. Ова навистина е поттикнато од напреднатото истражување - додава Вилијам Дахат, главен научен директор на здружението.

Но, целосната слика не е сосема розова. Извештајот предвидува дека во 2026 година на повеќе од два милиони луѓе во САД ќе им биде дијагностициран рак, а повеќе од 625.000 луѓе ќе умрат од болеста. Се очекува ракот на белите дробови да предизвика најголем број смртни случаи - повеќе од двојно повеќе од кој било друг вид рак, пишуваат авторите на извештајот. (Тоа е особено трагично затоа што, како што објавува „Сајентифик Американ“, многу од оние што се најмногу изложени на ризик од рак на белите дробови никогаш не се прегледуваат.)

Намалувањата на федералното финансирање за истражувања поврзани со ракот го загрозуваат напредокот на земјата, предупредуваат авторите. Само во првите три месеци од 2025 година, според извештај од Сенатот, финансирањето со грантови од Националниот институт за рак се намалило за 31 процент во споредба со претходната година.

- Иако децениите научни инвестиции се претворија во подолг живот за повеќето луѓе со дијагностициран рак, претстојните федерални намалувања на здравственото осигурување и истражувањето на ракот неизбежно ќе го намалат пристапот до лекови што спасуваат животи и ќе го запрат напредокот во време кога инциденцијата се зголемува за многу чести видови рак - заклучиле на крајот авторите на студијата.

Извор: scientificamerican.com

Фото: Freepik