Од Хомеровата „Одисеја“ до тајните тунели на ЈНА: Необична приказна за островот Млет
Голем дел од неговата површина е покриен со густи борови шуми, а западниот дел на островот е заштитен како Национален парк Млет - првиот морски национален парк во Хрватска.
Освен недопрената природа, солените езера и многуте заливи, островот е познат и по богатата историја и легендите. Многумина веруваат дека Млет бил митскиот остров Огигија, на кој според Хомеровата „Одисеја“, нимфата Калипсо седум години го држела грчкиот херој Одисеј.
Со островот се поврзува и приказната за апостолот Павле, за кого одредени историчари сметаат дека по бродолом можеби завршил токму на Млет. Благодарение на положбата на важни поморски маршрути, Млет низ историјата привлекувал различни владетели кои оставиле вредни културни и историски траги.
Воена тајна скриена меѓу боровите
Сепак, покрај природните убавини и легендите, Млет крие и помалку позната страна од своето минато.
Во текот на 20 век на островот биле изградени многу воени објекти, а меѓу најинтересните се подземните тунели и артилериските бази на локалитетот Спарожни рат, на западниот дел од островот. Денес, напуштени и делумно скриени меѓу боровите, тие претставуваат необичен потсетник на времето кога Млет имал важна стратешка улога во надзорот на јужниот Јадран.
Недалеку од Помена се наоѓа поранешна крајбрежна артилериска батерија на ЈНА, изградена во периодот на Студената војна. Комплексот се состои од мрежа од подземни тунели, простории и топовски позиции врежани во карпата.
Надзор на поморските правци
Поради стратешката положба на Млет, објектот служел за надзор на поморските патеки во Јадранот. Некогаш тука биле сместени четири топа поставени на шини, но денес е зачуван само еден.
Комплексот е напуштен и делумно обраснат со вегетација, но подземните ходници и топовските позиции и понатаму сведочат за военото значење што Млет го имал во втората половина на 20 век.
Освен љубителите на воената историја, оваа локација привлекува и многу љубопитни посетители кои сакаат да истражат еден од најнеобичните скриени агли на островот.
Извор:
Nezavisne.com
Фото:
Wikipedia