Додека едни размислуваат како да го надградат имиџот, други се исправени пред предизвикот да ги заврзат врвките на чевлите
Подготвил:
Сребра Ѓорѓијевска / srebra.gjorgjijevska@fakulteti.mk
Лектор:
Ивана Кузманоска
„Во моите чевли“ е насловот на изложбата на фотографии на модните дизајнерки Маја Ѓуреска и Антонија Гугинска-Јорданоска и на Росица Колева, специјален едукатор, која ќе биде отворена вечерва во 19 часот во „Мала станица“ во Скопје
Предизвикот со кој се соочуваат лицата со попреченост во процесот на селекција, купување и користење на облеката е една од инспирациите за проектот „Во моите чевли“, кој вечерва како изложба ќе биде промовиран во „Мала станица“ во Скопје.
Јулијана Петровска
- Времeто што им е потребно да се облечат и да се подготват наутро, помошта што им е неопходна за избор на облеката или за облекување, информациите за одржување на облеката, постојаната потреба за корекција и адаптација, се само мал дел од предизвиците на лицата со попреченост. Денес, повеќе од кога било, облеката претставува изразно средство преку кое човекот го прикажува својот идентитет и автентичност. Додека едни размислуваат како да го надградат својот имиџ, други се наоѓаат пред предизвикот да ги заврзат врвките на своите чевли - објаснува модната дизајнерка Маја Ѓуреска, која е една од авторките на проектот, заедно со Антонија Гугинска-Јорданоска, моден дизајнер, и Росица Колева, специјален едукатор.
Никола Колев
Тие споделуваат дека за време на подготовката на изложбата имале одлична соработка во поглед на исполнување на работните задачи.
- Остваривме и неверојатно емотивна комуникација, полна со доверба и меѓусебно разбирање. Тимот на „Во моите чевли“ помина шест недели во исклучително убава атмосфера исполнета со смеа, уживање и учење еден за друг и еден од друг - објаснуваат авторките.
Велат дека и тие многу научиле за лицата со попреченост.
Искра Донева
- Ја согледавме реалната потреба за поголема инклузија на лицата со попреченост во купопродажните процеси на облека, како и недостигот од адаптибилна облека која може да им го олесни секојдневното живеење. Исто така, забележавме дека голем фактор што ја попречува поголемата инклузија на овие лица во општеството е недостигот на информираност на јавноста и јавните сектори за нивните потреби - вели Гугинска-Јорданоска.