Го проголта пламен - уништен симболот на Копенхаген, стар 400 години
Се запали зградата на старата берза „Борсен“ во центарот на Копенхаген, која се наоѓа во близина на данскиот парламент „Фолкетинг“ и кралската палата „Кристијансборг“. Иако сите лица во зградата биле спасени и евакуирани, Данците тагуваат поради огромната загуба.
Имено, една од најстарите градби во Копенхаген - пример на холандскиот ренесансен стил во Данска, која била изградена во периодот од 1619 до 1640 година за време на владеењето на данскиот крал Кристијан Четврти - исчезна во пламен.
Кристијан Четврти ја изградил берзата затоа што сакал да го претвори Копенхаген во главен трговски центар на Северна Европа во 17 век.
Пламенот ја зафатил кулата
Пламените јазици го проголтале и го урнале најпрепознатливиот дел од зградата – „Драгеспир“, кула висока 56 метри, составена од испреплетени опашки на змејови што ги симболизираат блиските врски со соседните земји Норвешка и Шведска.
Зградата на старата берза „Борсен“ била исполнета со слики на Данци кои одиграле важна улога во данската историја од 17 век наваму. До 1974 година била центар на данската берза, а денес е дом на данската стопанска комора.
Зградата на старата берза била реновирана и била покриена со скелиња и заштитна пластика пред да избувне пожарот.
Сè уште не е познато што точно го предизвикало.
Извор: punkufer.dnevnik.hr
Фото: Assosiated press/Screenshot