Обединетото Кралство ќе тестира четиридневна работна недела

Четиридневната работна недела звучи примамливо за многумина, а некои компании и земји веќе го тестираат овој начин на работа. Нова пилот-програма во Обединетото Кралство е најновата во низата што ќе тестира четиридневна работна недела.

Програмата ќе трае 6 месеци и вработените што ќе учествуваат во неа нема да бидат платени помалку од претходно. Програмата ќе започне во јуни годинава и ќе вклучи 30 компании.

Зад неа стојат истражувачи од повеќе универзитети и организации, меѓу кои и „Кембриџ“ и „Оксфорд“. Во моментов трае пријавувањето на компаниите што сакаат да учествуваат во програмата.


Минатата година Исланд објави резултати од повеќегодишна програма за тестирање пократка работна недела. Резултатите покажале дека вработените се посреќни, поздрави и попродуктивни кога работат само четири дена во неделата. Компании меѓу кои и јапонската подружница на „Мајкрософт“ исто така тестирале вакви програми, а „Панасоник“ неодамна воведе опција за четиридневна работна недела за вработените.

Податоците покажуваат дека работниците ги поддржуваат ваквите иницијативи. Во анкета спроведена во САД на млади лица од 22 до 35 години било заклучено дека 80 отсто од испитаниците би поддржале воведување четиридневна работна недела.

Извор: Mashable
Фото: Pixabay