Бамбусот има потенцијал да биде „суперхрана“
Првиот академски преглед за консумирање бамбус открил изненадувачки спектар на здравствени придобивки, вклучувајќи помагање при контролата на шеќерот во крвта, борба против воспаленијата, подобрување на здравјето на цревата и дејство на антиоксиданс. Бамбусот е најбрзорастечкото растение на Земјата, при што некои сорти растат до 90 см на ден. Кина и Индија се најголеми производители во светот и иако бамбусовите никулци веќе се основна состојка во многу азиски диети, новото истражување покажува дека бамбусот би можел да игра важна улога во диетите низ светот.
Бамбусот е полн со протеини, има умерено ниво на влакна, има малку масти, содржи аминокиселини, селен и калиум и е природен извор на витамини.
Прегледот, во кој учествувале истражувачи од Универзитетот „Англија Раскин“, е првиот што ги собира и анализира сите објавени истражувања за консумирање бамбус, вклучувајќи испитувања врз луѓе (студии ин виво) и лабораториски експерименти врз човечки клетки (студии ин витро).
Истражувањето покажува дека бамбусовите никулци би можеле да помогнат во подобрувањето на метаболичкото здравје. Испитувањата покажале и подобра гликемиска контрола, што значи дека бамбусот може да помогне во регулирањето на нивото на шеќер во крвта, клучен фактор во управувањето со дијабетесот, и подобрувања во липидниот профил, што може да го намали ризикот од кардиоваскуларни заболувања.
Како извор на диететски влакна, вклучувајќи целулоза, хемицелулоза и лигнин, бамбусот ја подобрува и функцијата на цревата кај луѓето.
Исто така, било откриено дека соединенијата од бамбус го инхибираат формирањето на фуран и го намалуваат формирањето на акриламид. Ова се токсични хемикалии што можат да се развијат кога одредена храна се пржи или пече, што укажува дека бамбусот може да се користи за да се направи друга храна побезбедна.
Сепак, студијата идентификувала сериозни ризици поврзани со консумирање бамбус што не е правилно подготвен, бидејќи некои видови содржат цијаногени гликозиди кои можат да ослободат цијанид ако се јадат свежи.
Дополнително, една студија открила дека бамбусовите изданоци содржат соединенија кои можат да влијаат врз производството на тироидни хормони, зголемувајќи ја веројатноста за развој на гушавост, што е поврзано со повеќекратни здравствени компликации. И двата ризици може да се избегнат со претходно варење на изданоците.
- Нашиот преглед покажува надеж за бамбусот како можна „суперхрана“, но има и празнини во нашето знаење. Можевме да најдеме само четири студии во кои учествуваа луѓе кои ги исполнија нашите критериуми, па затоа се потребни дополнителни испитувања пред да можеме да дадеме цврсти препораки - заклучиле истражувачите.
Извор: medicalxpress.com
Фото: Freepik